Nongstoiñ, Nailar 28: Ka West Khasi Hills Badminton Association, ka phah ïa ka kyrwoh kitbok kit rwiang ïa u Secretary jong ka Association u bah Badonboklang Marweiñ, ba shong ba sah ha Ladweitang Nongstoiñ, u ban lam khmat ïa ka kynhun ïalehkai Badminton jong ka Meghalaya Team sha ka North East Zone Inter State Badminton Championship 2022, ka ban long ha nongbah Tripura ha u bnai u ban sa wan kata naduh ka 6 tarik haduh 11 tarik Nailur.
Ka Association ka da sngew sarong ïa kane ka jingshah jied jong u bah Badon ban long kum u Manager jong ka Meghalaya Team. Kane kan long ka burom ïa ka dong bad ka thaiñ hi West Khasi hi baroh kawei.
“Ngi la sakhi da la ki jong ki khmat ïa ka jingangnud bad ka jingtrei shitom ka jong u ïa ka kam ïalehkai, ban kyntiew ïa ki khynnah bad ki samla jong ka thaiñ ban wanrah ïa ki sha ka level kaba katkum ka standard kaba mynta. Ngi da sngewnguh ruh ïa ka Meghalaya Badminton Association bad ka State Sports, kaba la bynshet ha une u samla ban ïalam ïa ka team. Kyrmen kane ka jingleit ban ïa aireng ïa kane ka Inter State Zone Championship kan wanrah bun ki khusnam ïa ka Jylla”, ong ka kyrwoh na u Bah S.Lyndem President WKHDBA.
