Shillong, Nailar 29: Kum shibynta ban rakhe ia ka jingdak 75 snem ka jingioh laitluid ka Ri, ki shipai ka Border Security Force (BSF) Meghalaya Frontier kin pynlong da ka rally thuk thuk nangne na Nongbah Shillong sha Delhi ha ka 1 tarik u Nailur.
Ki shipai BSF kin pynlong ia ki prokram bapher bapher kynthup ia ka jingiapur iatem ha kylleng ki ktem jong ki shilai BSF, ki jingialehkai Volleyball bad phutbol bad ki shipai BGB, ka rally niah cycle, ka photo exhibition bad kiwei kiwei, kaba la sdang naduh u bnai Naitung haduh u Nohprah mynta u snem.
“30 ngut ki Nongniah thuk thuk ba kynthup ia 15 ngut na ka kynhun Janbaaz Motor Cycle bad 15 ngut n aka Seema Bhawani Team kin iashimbynta ha ka rally” pyntip u Inderjit Singh Rana, IG, BSF Meghalaya Frontier haba iathuh ba ia kane ka rally yn pynher lama da u Lajja Ram Bishnoi, DGP ka Jylla Meghalaya .
Kane ka Rally kan iaid lyngba ka Guwahati, Siliguri, Balurghat Berhampore, Kolkata, Dhanbad, Aurangabad Prayagraj, Kanpur, Agra kiba dei jong ka Jylla Assam, West Bengal, Jharkhand, Uttarpradesh bad yn pynkut ia ka ha Delhi ha ka 16 tarik u Nailur.
Kane ka rally na Shillong sha Delhi ka dei kaba la pynlong ban pynsngewthuh ia ki paidbah halor ka jingialong kawei jong ki nongshongshnong ka ri kam pher wat hapdeng ki jingiapher ki kolshor, ki riti tynrai, bad ka niam.
Kine ki Nongiashimbynta kin iakynduh ruh ia ki Khynnah skul, ki Dkhot ka NCC bad ki samla ha ki sor bapher bapher ba ki iaid lynti. Nalor kane kin ialap ruh pyrshah ia ka jingdih droks, jingkhaii tuh bad ban pyni ia ka phlim ba lyngka halor ka kamram ki shipai BSF ban iada ia ka Ri.
