Shillong, Naitung 28: Ka Sorkar pdeng kan dang ban mang ia ka song jingiarap pisa na ka bynta ka Jylla ban pynbha bad ban tei pat ia ki jingtei kiba la julor naki jingtwa khyndew bad jingshlei um ha ka jylla.
U Symbud Myntri Rangbah ka jylla Bah Prestone Tynsong u la pynpaw sha ki lad pathai khubor da ka ba ong, na ka liang ka sorkar jylla ka la dep phah ia ka jingtyrwa bad mynta ka dang ap ia kane ka jingiarap pisa.
U la pyntip ruh ba na ka liang ki kynhun bala phah da ka Ministry of Home Affairs, ka la dep lypa ban wan jurip ia ki jaka ki ba la shah ktah ha baroh kawei ka jylla.
“Sa shisien pat ka committee hapoh ka jingialam jong u Myntri ka sorkar pdeng u Amit Shah kum u chairman kan sa shong bad shim ia ka rai katno ka jingiarap pisa ka ba kin mang na ka bynta ka Meghalaya,” ong u Bah Tynsong.
Kham hashwa na ka liang ka sorkar jylla ka la buh jingkhein ba ki jingjulor na katei ka jingjia ka long tang kumba T.300 klur.
Na ka liang u Myntri Rangbah (CM) ka jylla u Conrad K Sangma, hadien ba u la pynlong ka jingleit jurip ia ki jaka ki ba la shah ktah ha ki jingtwa khyndew bad jingshlei um u la ong hadien ba la bishar bniah halor ki jingjulor ba jur kumta ruh ka jylla ka donkam shuh shuh ia ka jingiarap pisa khnang ban lah ban pynbha pat ia ki ba bun ki lynti surok bad ki jingkieng ki ba la shah rah bad shah pynjulor ha la um nalor kiwei pat.
