Shillong, Lber 12 : Ka Sorkar Jylla kala aiti ia palat 22.5 acre ka jaka sha ka Airport Authority of India (AAI) ba kan pynheh ia ka Shillong Airport.
Ia kane la pyntip da u Additional Advocate General (AAG) K Khan haba aiti ia ka kaiphod halor ki kam ba la leh, bala pynkhreh da u Joint Secretary ka Tnad Transport, hakhmat ka Division Bench jong ka Iingkashari Meghalaya High Court ha ka sngi Palei.
“Ia kane ka kaiphod lah pynrung lang ha ka jingthoh…” ong ka Iingkashari ba kynthup ia ka Justice Revati Mohite Dere bad Justice W Diengdoh ha ka hukum ba pynmih hadiien ba shong bishar ia ka PIL halor kane ka kam.
Ka kaiphod ka pyntip ba u Deputy Commissioner ka Ri-Bhoi District bad ki bor shipai, kila aiti ia ka jaka ba palat 11.75 acre bad 10.30 acrea sha ka Tnad Transport ha ka 28 tarik Kyllalyngkot bad 27 tarik Rymphang.
“Hadien kane, ka Tnad Transport kala aiti ia palat 11.75 acre na Ri-bhoi District bad 10.30 acre ka jaka shipai sha ka AAI ha ka 6 tarik Lber” kala ong haba bynrap ba ka Tnad Transport kala ai 7.7255 acre ka jaka sha u Defence Estate Officer, Guwahati Circle kum ka jingai bujli myn ha ka 6 tarik Lber.
Kat kum ka jingong u Deputy Solicitor-General N Mozika, katto katne por ka donkam ban ioh ia ki jing bit ban pom ia ki dieng na ka bynta ban pynheh ia ka Shillong Airport, ka ban long na ka Sorkar Jylla bad na ka Sorkar Pdeng.
Ka Iingkashari kala bthah ia ka Sorkar bad ka DGCA ba kin pyntip hapoh ka 24 tarik Lber ia ka por bala buh, khnang ba ki kam pynheh ia ka kad kin iaid noh shakhmat.
 ba kan pynheh ia ka Shillong Airport.){kind=link}