Shillong Rymphang 10: U Myntri Rangbah ka jylla u Conrad K Sangma ha ka sngi Thohdieng ula ong ba ka sorkar jylla kala iaid ha ka Mission ban kyntiew ia ki nongseng kam lajong ha ka jylla bad ka don ia ka jingthmu ban plie lad iaki 20,000 ngut ki nongsengkam ban ioh iaka jingkyrshan pisa lyngba ka CM-Elevate.
“Kum ka sorkar, ngi ngeit ba ka ioh ka kot jong ka ri, ka jylla kan lah ban iaid shakhmat lyngba ka jingseng kam lajong bad ki karkhana kiba seng da ki riewshimet” ong u Conrad haba ai jingkren ha ka PRIME MeghaPreneur Expo kaba la long ha madan Polo, Shillong.
“Ka kamram jong ka sorkar ka long ban thaw ia kata ka rukom treikam, ban pynbiang ia ki policy, ki lad ai jingiarap bad ki jingtei bapher bad ka rukom treikam kaban ai mynsiem ia ki nongseng kam lajong. Ngi don iaka rukom treikam kaba shaikdar, ngi la banjur halor ka jingseng kam lajong kum kata kaba buh hakhmat eh ban thaw bad ban ai iaki kam ki jam ha ka jylla” ula ong.
Ha ka jingaiti ia ki cheque sha ki riewshimet kiba la seng kam lajong bad ki kynhun kiba la shah khmih bniah ban shah jied ban ioh iaka pisa lyngba ka CM-Elevate, u Myntri Rangbah ula ong, “Ngi kwah ban thaw ia ka kolshor jong ka jingseng kam lajong. Ngi kwah ba ki samla jong ngi kin shym iaka kabu khlem ka jingtieng bad ban shimkabu iaki lad kiba don hapoh jong ka jylla. Kum ka jylla ngin bteng ban rakhe iaka mynsiem jong ka jingseng kam lajong”.
Ula ong ba ka CM-Elevate kadei ka prokram na ka bynta ki nongsengkam lajong bad kadei ruh kaba la iaid shitrhem bha hapoh ka ri bad ka sorkar kala ai ia ka lad ia ki samla ba kin ai ia kino kino ki jingtyrwa hapoh jong katei ka skhim.
“Kum ka sorkar ngin kyrshan ia ka jingtyrwa kaban kot haduh 75 percent ka jingai Subsidy bad ban ai jngiarap ia ki jingdonkam, rukom pyniaid bad ka jingkyrshan na ki riewshemphang ban pynthikna ba ka kam ka jongki, kan long kaba iaid beit bad kan seisoh” ula ong.
Nalor kane, ula pynpaw ruh ba ha ki 3-4 snem ban wan, ka sorkar kan ai jingkyrshan kumba 20,000 tam ki nongseng kam lajong kiba leh ia ki kam khaii bapher bapher hapoh ka jylla bad ula ong ruh ba ka sorkar kala mang ban pynlut T.300 Klur lyngba kane ka skhim.
“Ka jingthmu kaba iar jong kane ka skhim, ka long ban pynthikna ba ki samla kin ym shaniah tang ha ki kam sorkar hynrei kin wad ruh ia kiwei kiwei ki lad ban iohkam iohjam bad ka jingkyntiew iaka jingseng kam lajong kan iarap ha kaban aikam aijam ha ki kam kiba pyniaid da ki riewshimet” ong u Conrad.
U Myntri Rangbah ula ai khublei ia ka kynhun kaba nyngkong jong ki nongioh jingiarap bad ula ong, ba kane kadei tang ka jingsdang jong ka jingiaid lynti hynrei ha ki 3 snem ban wan yn plie lad shuh shuh ia kiwei pat ban mih shakhmat ban sdang sengkam lajong.
Kumba 40 ngut ki nongseng kam lajong kila ioh ia kajingiarap pisa lyngba ka CM – Elevate ha ka sngi Thohdieng na ka bynta ban tei ia ki Multipurpose Swimming Pool bad Gym, ka madan ialaehkai Futsal bad madan ialehkai Basketball.
Katba kiwei pat ki nongioh jingmyntoi na kiwei ki skhim kiba dei shi bynta jong ka CM-Elevate kila ioh ia ka jingiarap pisa lyngba ka Meghalaya Agriculture Warehouse Scheme, Meghalaya Community Facility Centre Scheme, Prime Agriculture Response Vehicle, Meghalaya Tourism Vehicle Scheme bad ka Meghalaya Motorcaravan Scheme.
