Agartala, Risaw 17: Ka CPI (M) kan sdang ia ka jingialap jong ka na ka bynta ka ilekshon assembly ka ban long ha une u snem u ban wan ha Tripura ha kaba na ka liang u general secretary ka party u Sitaram Yechury un ai ia ka jingkren ha ka rally paidbah ka ban long ha madan Astabal ha Agartala ha ka 21 tarik mynta u bnai.
U nongialam liang pyrshah u Manik Sarkar lem bad kiwei pat ki nongialam ba halor jong ka party ruh kin ia don ryngkat lang ha kane ka jingialang paidbah.
U Sitram Yechury la khmih lynti ba un pynlong ka jingwan jngoh shapoh Tripura na ka bynta ban aijingkren ha katei ka rally paidbah ka ban long ha ka 21 tarik mynta u bnai.
Ka mat ba kongsan jong kane ka jingialang paidbah ka long ban pynpaw halor ki buit sianti jong ka BJP ha kaba iadei bad ki kam pynngop paidbah bad halor ki jingpulom ki jong ka hashwa ban leit sha kane ka ilekshon assembly ka ban long ha u 2023, ong u state secretary ka CPI (M) u Jitendra Chowdhury.
Da kaba kynthoh pyrshah ia ka BJP, u Chowdhury ula kynnoh ba ka sorkar synshar BJP kala pyndonkam lyngba ka jingwan jngoh ba dang shen da ka president jong ka ri India ka Droupadi Murmu na ka bynta ban iada bad tap eit miaw ia ki saw snem shiteng jong ka jingpulom jong ka sorkar synrop BJP-IPFT.
Ia ka MLA hostel la wan plie da kane ka president jong ka ri hadien ka jingwan jngoh sha kane ka jylla, kata watla kane ka jingtei ka dang dep tang mar shiteng.
Ia ki mawnongrim na ka bynta ki artylli ki surok ruh la wan buh da ka Murmu, kam utei u nongialam ka CPI-M, kata da kaba thew halor ka jingpyrshang jong ka BJP ban pynhiar ia ka kyrdan bad ka burom ia ka shuki jong ka president.
