Shillong, Rymphang 13 : Hadien ka Congress, mynta sa ka BJP kala pynpaw ba kam donkam satia ia u Myntri Rangbah ka Jylla Conrad K Sangma ba un hiar shuki namar ka jingbthei ka par tih dewiong beain ha Mynsgat-Thangsko, East Jaintia Hills, kaba la shim ia ka jingim ki 31 ngut ki nongbylla.
U Nongaiktien ba rangbah duh ka BJP Bah M Kharkrang ha ka sngi Thohideng ula pynpaw ba ka BJP kan ap ia kaei kaba mih na ka Judicial Inuiry Commission bala thung da ka Sorkar ban tohkit ia kaei kaba jia ha Mynsngat-Thangsko haba ban jur ba ka Sorkar kala leh ia kaei kaba donkam.
“Ka Sorkar kala kubur ba kine ki jingjia kila jia, bad nga tharai kan bha ia ngi ban ap ia ka jingtohkit ba kan dep” ong u Bah Kharkrang haba iakren bad ki nongthoh khubor.
Halor ka jingdawa ia u Myntri Rangbah ban iehnoh ia ka tnad Mining, u Bah Kharkrang ula ong “Phim lah ban don ia u Myntri Rangbah uban shu iehnoh ia ka kam tang namar ki jingjia kiba jia. Ka Sorkar kala leh eiei halor kane-kane ka dei kaba kham kongsan ban ia kaba iehnohkam”.
Haba kylli, ula ong “Ki Pulit kila register ia ka case bad kila kem ruh ia ki briew. Ka Sorkar kala thung ia ka Commission of Inquiry bad to ngin iapeit ia ki kyndon treikambala buh ia kane ka Commission namar baroh kiei kiei ki shnong ha ki kyndon treikam”.
Ula kren halor ka jingshimkhia ba mar mar jong ka Sorkar Pdeng bad ong “Mar mar tang hadien ka jingjia, u Myntri Rangbah Duh jong ngi bad u Myntri kam Pohiing kila kren ia u Myntri Rangbah ka Jylla jong ngi ban tip ia kaei kaba jia”.
U Myntri Rangbah Duh ula phah ruh ia ka song pisa kum ka jingiarap sha ki briew ba shah ktah hashuwa ka jingpynbna jong ka Sorkar Jylla.
