Shillong, Rymphang 22: U Myntri Rangbah ka Jylla Conrad K Sangma ha ka sngi Palei ula ong ba ka Sorkar Jylla kam lah ban pyllait ia ka jingtih pathar kat kum ka juk hyndai (traditional mining) ia u shyiap ne maw ne kiwei kiwei ki marpoh khyndew khlem da ioh ia ki quarry permit lane ka lease bala ioh jingbit.
“Kam don satia kano kano ka kyndon ban pyllait ia ka jingtih pathar ia u shyiap, maw bad kiwei kiwei hapoh ka Meghalaya Minor Minerals Concession Rules (MMMCR), 2016 lane hapoh ka Mines and Minerals (Development and Regulation) (MMDR) Act, 1957. Ka Sorkar Jylla kam lah ban pyllait ia ka jingtih khlem da don ia ka quarry permit lane ka lease bala ioh jingbit hapoh ka kyndon jong ka MMMCR, 2016,” iathuh u Conrad hapoh Iingdorbar.
U Conrad ula pyntip ia kane haba jubab ia ka motion bala wanrah da u MLA ka VPP na Nongkrem halor ka jingeh ba iakynduh da ki nongtih shyiap tih maw ba rit ba ria (small scale mining) hapoh ka Jylla.
U Conrad ula ong ba namar ba kam don satia kano kano ka kyndon ba pyllait ia ka jingtih shyiap tih maw ha ki jaka bar it (small scale) hapoh ka Mines and Mineral (Development and Regulation) Act, 1957, kumta ka MMMCR, 2016 ruh kam lah satia ban buh ia ka kyndon ban pyllait ia ka jingtih shyiap, maw bad mawshun ha ka rukom ba ju leh baroh shikatta.
Ka MMMCR ka kren shai ba hap pynkhreh ia ka mining plan, environmental clearance, pollution clearance kat kum ka Air & Water Act nalor ka jingai jingbit jong ki District Council bad kiwei kiwei.
U Myntri Rangbah u ong ba ia mynta, khnang ban lah aplai ia ka jingtih shyiap, ka Sorkar Jylla kala pynkylla ia ka rule 4 jong ka MMMCR, 2016 lyngba ka notification ba pynmih ha ka 4 tarik Naitung, 2022.
