Shillong, Rymphang 22 : U Myntri bording ka Jylla Abu Taher Mondal ha ka sngi Palei, ula kular ban sa ai song jingiarap pisa sha ki bahaiing hasem jong u nongap pahara, uba iap shah lymbat bording ha ka sub station aba don ha Stage-I jong ka Dam Umiam.
“Nga la iakren hi shimet ia kane ka kam bad ka MeECL bad nga kular ba yn sa ai jingiarap song pisa sha ki bahaiing jong une u lanot” ong u Mondal haba jubab ia ka call attention motion bala wanrah da u MLA ka VPP na Mawlai Bah Brightstarwell Marbaniang ha Iingdorbar.
Ula ong ba u (L) Kyrshanborlang Muktieh, uba ap pahara miet bad ba trei bad ka M/s ITC Cementation India Ltd ula iap shah lymbat bording ha ka 29 tarik Kyllalyngkot hadien ka jingiatakhuh bad u waiar bording jong u transformer ha ka por ba u rung sha sub station.
U Mondal ula ong ba u Kyrshanborlang um dei satia u nongtrei ka MeECL bad ula trei kum u nongpahara jong ka ITD Cementation, kaba maramot ia ka jingkieng Umiam.
