Shillong, Jymmang 28: U Myntri Sorkar u Bah AL Hek ha ka sngi Baar ula ong, ba watla ka roi ka par ka long kaba kongsan ban kyntiew ia ki nongshong shnong bad ia ka Jylla baroh kawei hynrei kam dei pat ban long ka daw jong ka jingwan buhai shnong be-aiñ ki briew ha ka jylla.
Haba kren sha ki lad pathai khubor u Bah Hek ula ong, ba ka jingpyntreikam ia ka lynti Rel la ka long ka Rel kit mar ne ka Rel kit iaki nongleit nongwan kadei ban pynlong tang hadien ba la pyrkhat bha ia ka jingktah jongka ia ka jingwan buhai shnong ki briew.
“Ngim dei ban pynsangeh ia ka roi ka par hynrei ngi dei ban bishar ia ki jingmyntoi bad jingsniew na kum kita ki projek kam pynroi. Ngi hap ban bishar bniah shwa bad lada wanrah ia ka lynti Rel ngi dei ruh ban tip kumno ngin lah ban iada ia ka Jylla na ka jingwan buhai shnong ki briew shapoh kane ka Jylla” la ong u Bah Hek.
U Bah Hek u la ong, ba ka lynti rel ka long kaba kongsan bha na ka bynta ban kyntiew ia ka Jylla bad ka thain bad kumba ka long mynta ka lynti rel kala wan shapoh ka Jylla Mizoram bad Arunachal bad sha ki jaka ba jngai ha ki khappud jong ka Ri.
“Haba kam ba ki paidbah ka thaiñ Mendipathar Garo Hills kila ioh jingmyntoi namar ka jingdon ka lynti Rel, u Bah Hek u la ong “To ngin sdang da ka rel kit mar kumba ngi la sdang ha Mendipathar. Mynta ki briew na Mendipathar ki la die lut ia ki mar ki mata bad ki la ioh dor kham bha na Mendipathar sha Guwahati. Shisien ba ngi la ioh ia ka rel kit mar hangne ha Khasi Hills ne Jaintia Hills, lehse ia ki mar jong ngi lah ban die ym tang ha ki iew jong ka Jylla hynrei wat shabar ka Jylla bad shabar Ri”.
Ha kaba iadei bad ka jingdawa ban pyntreikam ia ka Inner Line Permit (ILP) ha Meghalaya, u Myntri Sorkar ula ong, ba ka ILP kam dei tang ma ka, ka lad ban iada bad ban peit ia ka jingwan buhai shnong ki briew shapoh ka Jylla.
“Kam dei tang ia ka ILP, ngi lah ruh ban pyntreikam da ka Meghalaya Residents Safety and Security Act (MRSSA), shisien ba ka MRSSA kala don bad shisien ba ngi la lah ban pynthikna iaki lad jingïada naka jingwan buhai shnong be-aiñ tang nangta ngi lah ban sdang ia kren ia ka lynti Rel” u la ong.
