Shillong, Rymphang 26 : U Lamphang ka Iingdorbar Thaw Ain Thomas A Sangma ha ka sngi Nyngkong, ula weng noh ia ka jingkren u MLA ka VPP na North Shillong Bah Adelbert Nongrum na ki jingbuh jingthoh jong ka Iing (Proceeding) ba buh jingkylli ia ka bynta jong u Lat haba iatai ia ka jingkren u Lat myn ha ka 19 tarik Rymphang.
“…..haba phai sha u Lat ha ka jingkren jong u Bah Adelbert Nongrum, MLA, ha ka jingiatai ia ka jingkren lamphrang u Lat myn ha ka 19 tarik Rymphang, dei ban weng noh na ka jingbuh jingthoh jong ka Iing. Kane ka dei ka hukum jong nga” ong u Thomas hadien ba sot ia ki rule pyniaid ia ka Iingdorbar.
Ula ong ba ha ka jingkren halor ka jingiatai ia ka jingkren lamphrang u Lat, kaba la kren ha ka Khasi bad bala ai ruh da ka jingthoh ia ka jingpynkylla ktien sha baroh ki dkhot, u Bah Adelbert ula kren ruh halor ka bynta jong u Lat ka Jylla bad ki Lat jong kiwei pat ki Jylla ha ka jingkren jong u.
U Lamphang ula ong ka Ophis u Lat ka dei ka Ophis kaba heh kyrdan bha. U dei u khlieh riti synshar jong ka ri India bad la thung ia u da ka President ka Ri India hapoh ka Article 155 bad 156 jong ka Riti Synshar ka Ri India. Kumra, ka jingtreikam jong u Lat ka dei kaba la iada ban iatai hapoh ki Iingdorbar Thaw Ain ki Jylla.
