Shillong, K’Lyngkot 05: Ki kali kamai Tourist Shillong-Guwahati kila rai ban sdang kamai biang noh naduh lashai ka step por 5 baje wat hapdeng ka jingiakhih ki seng jong ki kali tourist ban pyrshah ia ka jingthmu pynkylla ka Sorkar Pdeng ia ka Motor Vehicle Act.
Kat kum kane ka jingtyrwa ban pynkylla ia ka Ain, la pynheh ia ka kuna bad ka por shong along ia ka hit-and-run case(tynrah briew bad phet krad), ka ban sa pyntreikam hapoh ka Bharatiya Nyaya Sanhita (BNS).
Ki kali tourist kiba kamai hapdeng ka Guwahati bad Shillong, kin kit briew biang naduh lashai ka sngi Saitjain ha ka por 5 baje mynstep bad ia kane la pynthikna ruh da ka All Meghalaya Tourist Taxi Drivers Association.
Lah ban kdew ba ki kali tourist kila khot ia ka jingiakhih da kaba sangeh kamai haduh 48 kynta, kaba sdang hynne ka step sngi Thohdieng ha baroh kawei ka Jylla ban pyrshah ia ki kyndon ka Bharatiya Nyaya Sanhita (BNS), ka ban sa pyntreikam.
Ka Bharatiya Nyaya Sanhita (BNS), kala bujli ia ka Indian Penal Code (IPC), 1980 ha u Nohprah 2023. La IPC ka dei ka Criminal Code ka India naduh ba ioh laitluid, kaba la shim pateng na ka Sorkar Bilat.
Ka Bharatiya Nyaya Sanhita, 2023, Bharatiya Nagarik Suraksha Sanhita, 2023, bad Bharatiya Sakshya Bill, 2023 ki dei ki lai tylli ki Bill bala wanrah, kiba iadei bad ka criminal justice system. Kine ki Bill ki dei kiban pyntikna ba ki lanot kin ioh ia ka jingbishar kaba hok.
