Shillong, K’lyngkot 06: Ka Tnad Meghalaya Police kala pynkhlain bha ia ka bor peitngor hadien ka jingioh ia ka email bym lah ban tip hynne ka sngi Thohdieng, kaba byrngem bala buh bomb ha baroh ki Iingkashari hapoh ka Ri kynthup ka Meghalaya High Court.
Ka Iingkashari Meghalaya High Court kala ioh pdiang ia kane ka email ha ka por 5:54 baje mynstep sngi Thohdieng.
Kat kum ki jintip bala ai, ia kane ka email la phah na ka [email protected] kaba kam “ Nga la buh bomb hapoh ka Iingkashari jong phi bad baroh ki Iingkashari ha Ri India. Ia une u bomb la buhrieh bha bad un sa bthei ha ka por mynstep. Phin sa kut hapdeng ka snam ba lyngkien”.
“Ngi dei ka kynhun ba khot ‘Terrorizers 111’. Ai ka kyrteng ka kynhun jong ngi sha ki lad pathai khubor lem kumta ngin ym sangeh ban leh ia ki kam pyntriem”.
Ia kane ka email la phah ruh sha ki Iingkashari bapher bapher jong ka Ri.
U Superintendent of Police ka East Khasi Hills Bah Sylvester Nongtnger ula ong ba ki Pulit kila pynjur bha ia ka jingpeit ngor hadien ka jingioh ia kane ka email. “Ngi la pyntip ia ki bor pahara hapoh ka Iingkashari” ula bynrap.
Ha kajuh ka por, ka khubor ka pyntip ba ki bomb squad bad ki ksew sma bomb, kila leit sha ka Iingkashari Meghalaya High Court ban wad ia u bomb.
