Shillong, Nailur 18 : Ka All Khasi Meghalaya Tourist Taxi Association (AKMTTA) kala ria ban weng noh ia ka jingiakhih ba khlem pud pyrshah ia ka jingwan rung ki kali nabar ka Jylla sha ki jaka jngoh kai kiba don ha Meghalaya.
Ia kane ka rai la shim hadien ka jingialang bad ka Deputy Commissioner ka East Khasi Hills, kaba la kular ia kane ka seng ba ka Sorkar Jylla kan s alum ia ka jingialang la sngi Ba-ar ban pynbeit ia ki mat kiba pynsngew da ki kali tourist.
“Ka Association kala rai ban pynsangeh shipor ia ka jingiakhih khlem pud tad haduh ka sngi Ba-ar,ka ban shong ruh na kaei kaba mih na ka jingalang” ong u Nongaiktien ka AKMTTA Balajied Jyrwa haba iakren bad ki nongthoh khubor hadien ka jingialang ha ka sngi Ba-ar.
U iathuh ba kane ka jingialang ban wan kan long hapdeng ka Tnad kam Pohiing (Police), ka Tnad Transports bad ka tnad Tourism nalor ki dkhot jong ka Association.
“Ngin sa shim biang ia ka rai kat kum ka jingmih na kane ka jingialang ban wan” ula bynrap.
Ka rai ban khot iakren ia kane ka Association kala mih hadien ba ki kali na Meghalaya kila shah khang ban rung sha Assam kum ka jingpyrshha ia ka jingiakhih ka AKMTTA.
U Jyrwa ula kam ba ka jingiakhih jong ka Association ka long kaba jai jai bad kam pat shym la ktah ia ka shongsuk shongsain.
“Ka jingiakhih ka dang long tang ha ka jingsam ia ki kot lyngkdop ban pynsngewthuh ia ki paidbah halor ki jingeh ba la mad da ki kali tourist ka Jylla” ula ong.
Une u nongaiktien ula pynshai ba ka jingjia ha Assam, ha kaba ki kali Meghalaya kila shah khang ban rung sha Assam, ka dei tang ka jingsngewthuh bakla.
“Ka AKMTTA kam shym la khang ia ka jingwan rung ki kali Assam sha Meghalaya, hynrei ka shu dawa ba ki kali ba nabar ka Jylla dei ban pyrrkhing ba kin leit kamai sha ki jaka jngohkai kiba don ha Meghalaya” ula ong.
 kala ria ban weng noh ia ka jingiakhih ba khlem pud pyrshah ia ka jingwan rung ki kali nabar ka Jylla sha ki jaka jngoh kai kiba don ha Meghalaya.){kind=link}