Shillong, Rymphang 10 : Ka National People’s Party (NPP) ha ka sngi Nyngkong, kala kyntu ia ki paidbah ka Ri-lum Khasi- Jaintia ba kim dei ban shaniah ia u President ka Voice of the People Party (VPP) bad MLA ka Nongkrem Ardent Miller Basaiawmoit namar u dei u Nongialam u bym don ia ka nongrim bad uba kylla khlieh khlieh tdong tdong haba iohi ia ki kabu.
Kane ka jingkynthoh kalamih na u General Secretary ka NPP bad Symbud Myntri Rangbah ka Jylla Bah Sniawbhalang Dhar haba kren ha ka rynsan ialap elekshon ban pan jingkyrshan ia u kyrtong ka Raliang constituency Bah Bison Roy Iano ha Biar bad Rtiang.
“U Bah Ardent Basaiawmoit kum u Nongialam sain pyrthei u dei uba dang duna bha ha ka jingshemphang” ula ong.
U Bah Sniawbha ula ong “Khlem ka jingshemphang, kan long kaba eh ban shakri ia u paidbah. Kumta, ngi donkam ia ki nongialam ba shemphang namar ka long kongsan bha. U Myntri Rangbah Conrad K Sangma u dei u nongniah ia ka bus ka Sorkar MDA mynta la 7 snem tam. U dei uba la shemphang bha, ngim dei ban khuslai”.
“Hynrei, u President ka VPP u dei u Chief Executive Member (CEM) ka KHADC hynrei tang hynriew-hynniew bnai ula hap na shuki, ka EC jong u kala khyllem. Tang namar u Mukul Sangma bad sheptieng ia ka jingshah mait kyrteng kum u MLA, ula iehnoh ia ka kam MDC. Kine baroh ki wan jia namar ba u dei u bym pat shemphang bad u bym don nongrim kum u nongialam sain pyrthei” ula ong.
U Bah Sniawbha ula ther tyngeh ruh ia ka jingkren u President ka VPP ba ong ba ka kam sang kam don satia ha ki shnong Nongkyndong. “U Bah Ardent ula pynshlur ia ki kam shongsang. Kane ka pyni ia ka jingbym shemphang jong u kum u Nongialam. U President ka VPP u nud ban wad daw ia ki Rangbah Shnong bad kam pat ba ka party jong u ka dei kaba ieid ia ka Jaidbynriew. Kumno phi ieid Jaidbynriew haba phim shaniah wat ia ki nongtrei kam shnong?”.
Haba kynnoh ba ka don ka jingiapait iapra hapoh ka VPP, u Bah Sniawbha ula ong “Ki don 4 ngut ki MLA hynrei uwei na ki, um donlang shuh bad ka party. Ka Prah kala kylla long Pra. Ka dei satang ha ka VPP ba la ai ticket MDC khlem da burom ia u MLA. Kane ka pyni ba ki nongialam ka VPP ki dei ki bym pat shemphang”.
Haba kyntu ia ki paidbah ba kim dei ban shah ialam bakla ia ki jingkynnoh ba ka NPP bad BJP ki dei kajuh, u Symbud Myntri Rangbah ula ong “ Kumno ka kot bad u syntiew kin dei kijuh. Sngewbha wat ngop ha kum kine ki jingpyrshang ban ialam bakla ia phi. Ka NPP ka don la ki jong ki mat treikam bad ka jingithuh”.
Ula kam ruh ba ka Meghalaya kala ioh bun ki kam pynroi namar ka Sorkar ba ialam da ka NPP kala iatreikam bad ka Sorkar Pdeng bad ong “Ym kum ki Jylla kum ka West Bengal ha kaba ka CM ka kynthoh pyrshah pyrshah ia u Myntri Rangbah Duh ka Ri, kala ioh khyndiat bha ki kam pynroi”.
U Bah Sniawbha ula kyntu ia ki paidbah ba kin kyrshan ia u Bah Bison Roy Iano ban pynthikna ba kin ioh ia ka double engine hadien ka elekshon ADC. “Ngi kwah ban pynthikna ia ki kam pynroi ha baroh ki liang” ula ong.
Shuwa kane, haba kren ha Biar, u Bah Sniawbha ula ong ba ka VPP kala kam ba dei tang ka jingieid ia ka Jaidbynriew kala biang palat bad ka roi ka par kam donkam satia.
“Hynrei kat kum ka jingsngew jong nga, lada phi ieid ia ka Jaidbynriew, phi dei ban wad ia ki lad ki lynti ban wanrah ia ki kam pynroi sha u paidbah bad ka Jylla” ula ong.
Ula kynnoh ruh ba bun ki briew kila jied ia ka VPP ha ka elekshon MP tang namar ka jingrwai elekshon.
 ha ka sngi Nyngkong, kala kyntu ia ki paidbah ka Ri-lum Khasi- Jaintia ba kim dei ban shaniah ia u President ka Voice of the People Party (VPP) bad MLA ka Nongkrem Ardent Miller Basaiawmoit namar u dei u Nongialam u bym don ia ka nongrim bad uba kylla khlieh khlieh tdong tdong haba iohi kabu.){kind=link}