Shillong Rymphang 19: Hadien ka jingmih ki khubor ba ka North East Frontier Railways (NFR) ka thmu ban sorjamin biang ha ki thain Ri-lum Jaintia Hills ban wanrah lynti rel, ka Ka KSU East bad West Jaintia Hills District kala byrngem ba kala long kaba la khreh ban iakhun pyrshah lada ka don ka jingwan leh da ka bor.
Ka KSU East bad West Jaintia Hills District Unit lyngba ka kyrwoh, ka phah khubor sha ka NFR ba kam dei ban tynruh bad ai ding halor ka lynti rel, namar ki long kiba la pynkhreh ban tyngkhuh lada leh da ka bor.
“Ka jingkwah khah khah ka NFR ban wanrah ïa ka lynti rel sha kine ki thaiñ ka la poi haduh u pud ba kam kheiñ snep shuh ïa ki Autonomous District Council (JHADC) kaba dei ban kynjoh ktien ban ioh ïa ka No Objection Certificate (NOC) bad ka jingthmu ka NFR ban sorjamin biang ia ka lynti rel ha Jaintia Hills kam kheiñ snep ruh wat ïa ka rai jong ka sorkar jylla. Ka KSU ka maham ïa ka NFR ba kam dei ban leh tam bad da leilei, ngin ym ailad ïa ka jingpyntrei ïa ka lynti rel ba kan ïaid shakhmat wat lada ka sorkar ka thom da ka bor kumba kala jia ha kine ki khyndiat bnai kiba la dep” pynpaw ka KSU.
Ka seng ka dawa ïa ka Jaiñtia Hills Autonomous District Council (JHADC) ba kam dei satia ban ai No objection Certificate (NoC) sha ka North-East Frontier Railway (NFR) ne sha ka Sorkar ban pynpoi ïa ka lynti Rel ha ki bynta jong ka Jaintia Hills, katba ka Sorkar kam pat lah ban wanrah ïa ki aiñ kiba khlaiñ kiba ïada na ka jingwan tuid kyrthep ki poi ei hapoh ka bri u Hynñiewtrep.
Ka KSU East bad West Jaintia Hills District kala pynpaw ba ka North East Railway Frontier ka don jingthmu ban sorjamin ia ki jaka ban pyniaid lynti rel na Bhoksong, Rajagaon, Baithalangso, Jengkha, Kherani bad Umrangso kaban kut ha Jowai.
“Ka jingthmu jong ka seng ban pynsngew sha ka Jaiñtia Hills Autonomous District Council ka long halor ka nongrim ban kyntu ïa ka Council hi baroh kawei ba kan pyrkhat rangbah bad ban ym ai NoC ïa ka NFR kaba dei ban khmih ïa kane ka projek. Ka seng ka ban jur ïa ka District Council kaba long ka stieh ïada jong ka jaidbynriew ba kan da pyrkhat sani bha halor kane ban nym ai satia ïa ka NoC. Ka seng ka khmih lynti ba ki nongïalam bad ki nongmihkhmat jong ka JHADC kidei ban don kajuh ka sur halor ka lynti Rel’ la pynpaw ka seng KSU.
Kila pyntip ruh ba kin sa aiti da ka jingthoh sha ka Sorkar lyngba u Deputy Commisisoner ban pynpaw ïa ka jingpyrshah ka seng ban pynpoi ïa ka lynti Rel ha Jaiñtia Hills District.
“Ka seng ka iengskhem halor kane ka mat katba ym pat don ki aiñ kiba khlaiñ ban ïada ïa ngi kum ka jaidbynriew ritpaid, ai ba ka jingïakren halor ka lynti Rel kan sangeh shwa. Ka seng, naduh u snem 1988 kala pyrshah ïa kane ka jingthmu jong ka Sorkar ban iuhroit ïa ka jaidbynriew bad kan ïai pyrshah katba ka Sorkar kam pat pyrkhat thymmai ban wanrah ïa ki aiñ kiba khlaiñ ban ïada ïa ngi,” ong ka kyrwoh ka seng KSU.
Ka KSU kala pynkynmaw, ba ka Sorkar kala pyrshang ban pyntrei ïa kane ka project na Tetelia sha Byrnihat hynrei ka seng kala pynpulom ïa kane ka jingthmu da kaba pyrshah jur bad pynsangeh ïa kane ka projek ha u snem 2017.
Ka seng ka kyrpad bad wer ruh ïa ki Dorbar Shnong, ki paidbah bad khamtam ïa ki MLA bad MP ba kin ïatreilang halor kane ka kam bad bynrap ruh ba ka seng kan nang ïai buddien ïa kane ka kam bad shim ruh ki lad ki lynti ban pynshai sha u paidbah halor ka jingma kiba ap lada wan ka lynti Rel.
“Ka seng ka sngew ban pynpaw ruh sha ka Sorkar ba kam dei ban im sngi tang ïa ka lynti Rel hynrei to pynleit jingmut bad pynurlong ban wanrah shwa ïa ka roi ka par sha ki paidbah ka thaiñ naduh ka surok, ka koit ka khiah, ka pule ka puthi bad kumta ter ter bad ngi la kren shai ba katba ka jylla Meghalaya kam pat biang ïa ki aiñ ki ban ïada kumta ngin nym ailad ban wanrah ïa ka lynti Rel” la pynut ka kyrwoh na ka seng.
