Shillong, Naiwieng 04 : U President ba nyngkong eh ka FKJGP Bah Sounder Strong Cajee hynne ka sngi thohdieng, ula kyntu ia ka Sorkar Jylla ba kam dei ban khein sting/ialehkai ne thom da ka bor ia ki Sengbhalang haba ki mih ban dawa halor ki ishu bapher bapher.
U Bah Sounder ula kren ia kane ha ka jingialang plie paidbah ia ka Ophis treikam ba pura jong ka FKJGP kaba don ha Mawlai Kynton Massar.
“Ka Sorkar ka dei ban sngewthuh bad ban khot ia ki Sengbhalang ban iakren haba ki mih ban dawa ia kano kano ka kam ym ban khein sting ne thom da ka bor ia ki” ula kyntu.
Halor ka jingjia ba mih na ka jingiaid rally ba jai jai jong ka FKJGP kaba la pynmih ia ka huri hura, u bah Sounder ula ong “Ngim pynshlur ia kum kine ki jingjia hynrei kane ka dei ka khubor ba ka Sorkar ka hap ban pyrkhat bha haba don ki Seng kum ka FKJGP lane ka KSU ne kino kino ki seng ki mih ban iaid rally ne pynlong jingialang. Ka Sorkar kam dei ban shim ia ki kum ki kynhun ba pyrshah sorkar”.
Kum u Nongialam barim ki Sengbhalang ialade, u Bah Sounder ula ong ba ka Sorkar kam lah satia ban pynsangeh ia ki ban ieng iakhih halor ki jingdawa bapher bapher na ka bynta ka jaidbynriew.
“Nga dei u Nongialam mynshuwa bad nga la shah kem la bun sien hynrei kane kam shym la pynsangeh ia nga. Hadien ba nga lait na along nga la sdang biang ia ki jingiakhih…ka khubor sha ki samla ba shah kem, lada phi lait na along phi dei ban sdang biang hynrei ym da kane kajuh ka lynti” ula ong.
U Bah Sounder ula buh ruh ka jingkyntu ia ki Nongialam ba mynta jong ka FKJGP ban shna sa ia ka Ophis treikam ha Ri-lum Garo.
