Nongpoh, Naiwieng 04: Ka Joint Action Committee (JAC), kiba kynthup ki nongïalam shnong, ki kynhun sengbhalang bad ki nongñiah kali ka thaiñ Umden, kila dawa ia ka Sorkar ba kan phah maramot bad siang rong noh ia ka surok Nongpoh -Umden-Sonapur kaba la jot rathai na ka jingieh shrah mynta la bun bun snem.
Kane ka jingdawa kala mih hadien ka jingleit jurip ia kane ka surok hynne ka sngi thohdieng namar ka jingiaud ianam palat ia ka jingsniew bad jingjot jong kane ka surok kaba la dap satang da ki thliew ki syar bad buh jingeh ia u paidbah ha ka leit ka wan.
Kiba la iadonlang ha kane ka jingjurip ki kynthup ia ki Rangbah Shnong ka thaiñ Umden, ki nongïalam ka RBYDSO, HYC bad ka Umden Area Local Taxi Driver and Owner Association ha kaba la lap ba kane ka surok kala pynshitom ïa ka leit ka wan ki paidbah kiba sah ha ki palat spah tylli ki shnong kiba na ka thaiñ Umden.
Haba kren bad ki Nongthoh Khubor, u Chairman ka JAC Bah Mathaias Syiem bad u Secretary Bah Kerbok Mallai ki la pynpaw ïa ka jingsngewkhia kaba jur halor ka jinglong jingman jong kane ka surok naduh Nongpoh, Umden shaduh Sonapur kaba la pynsyllang palat liam ia u paidbah ha ka leit ka wan khamtam ki khynnah skul, kiba pang shitom bad kiwei kiwei.
“Ka long shisha kaba sngewsih ba ka sorkar ka la shu ïai thok ïa u paidbah khlem da pyndep ïa ka jingkular ba la kular la bunsien ban siangrong noh ïa u ne u surok khamtam ka jingkular na u Symbud Myntri Rangbah ka jylla Bah Prestone Tynsong kaba khlem la urlong ne ïohi dak haduh mynta”, kren diaw ki nongïalam.
Kine ki nongïalam ka JAC ki ka dawa mardor na ka sorkar MDA ba kan pynurlong noh ïa ka jingkular.
U Bah D Shylla, SDO ka tnad PWD Nongpoh u ba la synran lang ha kane ka jingjurip u la kular ba ka tnad kan shimkhia mardor ban maramot ïa u ne u surok kumba 17 ne 18 kilometres ha kine ki bnai ban sa wan
