Imphal, Iaiong 03: U Myntri ka tnat kam pohïing ka Sorkar Pdeng, u Amit Shah u la rah ïa ka Statutory Resolution hapoh ka iingdorbar Lok Sabha halor ka jingpynbna daka President Rule hapoh ka Jylla Manipur hadien ka jingïatai halor ka The Waqf (Amendment) Bill 2025 kaba la ïaid la palat 12 kynta.
Naka liang u nongïalam ka Congress Shashi Tharoor u ong ba ka Party ka kyrshan ïa ka President Rule hapoh ka Jylla kaba la don ka jingïakynad, hynrei dei ban pyndonkam ïa ka ain ha ka ban wanrah biang ïa ka jingsuk bad ka jinglong jingman kaba shngain.
“Kito kiba la shah bynshet ban pynneh pynsah ia ka suk ka sain kim shym la leh ia la ka jong ka kamram. Ki khlem shim ïa kano kano ka sienjam mynta la jan ar snem. La pynjari President Rule tang hadien ba u Myntri Rangbah ka Jylla u la hiar shuki. Ka Congress kala dep pynkhreh ia ka No Confidence Motion. Ki thikna ba kim ioh shuh ban ioh ka jingshaniah namar kata la pynjari syndon daka President Rule” u la ong.
U Shashi Tharoor u la ong ba ki nongbishar ba khlieduh ka Supreme Court ki la leit sha Jylla Manipur, u Myntri Rangbahduh ka Ri ruh u dei ban leit sha katei ka jylla.
U la ong ba kumba 60,000 tylli ki tiar iasiat bad 6,00,000 tylli kuli kila shah lute na ki jaka buh tiar ialeh hapoh ka Jylla.
Naka liang u Amit Shah u la jubab daka ba ong ba ha ki saw bnai ba la dep kam shym la don kano kano ka jingjia ïaumsnam hapoh ka Jylla. “Ngi la wanrah ïa kane ka jingpynbna hapoh ar bnai naduh ba la pynjari ïa ka President’s Rule hapoh ka Jylla. La kyntu ban iatreilang ban kyrshan ïa kane bad ban wanrah biang ïa ka jingsuk bad jingshngain hapoh ka Jylla Manipur. Ka sorkar ka dang trei ban wanrah biang ïa ka jingsuk”.
 Bill 2025 kaba la ïaid la palat 12 kynta.){kind=link}