Shillong, Naitung 11 : Ka jingshongshit phutbol kala wanphai biang sha Meghalaya ha ka sngi Thohdieng da ka jingwan poi ki lai tylli ki Trophy jong ka 135th Durand Cup ha Shillong, kaba pynsdang ia ka jingiaid lynti ka trophy sha ki Jylla hashuwa ka jingsdang jong kane ka lympung ialehkai kaba rim duh ka dewbah Asia.
Ia kine ki trophy la plied ha ka jingialang bala pynlong ha State Convention Centre. Ia kine ki trophy yn rah mynta ha kylleng ka sor Shillong, Jowai bad Tura, ka ban ailad ia ki riewieid phutbol ka Jylla ia ka lad ban iohi ia ki hashuwa ban sdang ki jingialehkai.
Ha kane ka jingialang la wan iashimbynta da ki Myntri ka Tnad Ialehkai Bah Wailadmiki Shylla, u Lt Gen Mohit Wadhwa, SM, GOC 101 Area, Air Marshal Devendra P Hirani, SASO Eastern Air Command, DGP Idashisha Nongrang, Maj Gen D.K. Singh, SM, VSM, GOC Bengal Sub Area, Sports Secretary Isawanda Laloo, bad ki heh ophis na ki Shipai bad ki Kynhun ialehkai.
Haba kren ha ka jingialang, u Myntri ula ong ba ka phutbol ka dei kaba la suhthied bha ha ka jingithuh ia ka Jylla Meghalaya.
“Ka phutbol kam dei tang ka jingialehkai ha Meghalaya- ka dei shibynta jong ka jingithuh kyrpang jong ngi. La ialehkai ia ka ha man ki shnong, man ki skul, man ki sor bad man ki district. Ka pyniatylli ia ki shnong, ai mynsiem ia ki samla jong ngi bad wanrah ia ka jingsarong kaba khraw ia ka Jylla jong ngi” ula ong.
Ula ai khublei ia ki shipai India bad ka Durand Cup Oraganising Committee namar ka jingai ka jingshaniah ha ka Jylla Meghalaya, bad bynrap ba ka Jylla ka kwah ban pynlong ia ka phainal jong ka Durand Cup ha ki snem ban wan.
Haba pynpaw ia ki jingkyntur ka Sorkar, ula pyntip ba palat 35,000 ngut ki nongialehkai ki ju iashimbynta ha ki lympung ialehkai ba ju pynlong man u snem ha Jylla, bad ka Jylla kala pynlong ia palat 14 tylli ki lympung National bad International naduh u snem 2022.
Ula ong ba ki jingkynshew ha ki stadium bad ki training programme kila ai ia bun ki lad thymmai na ka bynta ki samla haba kyntiew ruh ia ka kam jngohkai bad ka jingaikam aijam.
U Lt Gen Mohit Wadhwa ula ong ba ka Shillong kala pynskhem ialade kum ka jaka pynlong kaba kongsan ia ka Durand Cup namar ka kolshor jong ka ha ka jingialehkai phutbol bad ka jingkyrshan ki riewieid phutbol.
Ula ai jingiaraoh ia ka jingiohjngai jong u Myntri Rangbah Conrad K Sangma, haba pynpaw ba ki jingkynshew ka Jylla kala pynlong ia ka Meghalaya ban lah pynlong ia ki lympung kiba heh kum ka Durand Cup bad ka National Games.
Ha kane ka samoi ialehkai ba mynta, lai tylli ki Club na Jylla kin mih madan ban iakhun ha ka lympung. Kine ki dei ka Shillong Lajong FC, ka Nongkseh SS&CC bad ka Langsning FC, ki ban mihkhmat ia ka Meghalaya.
Ka 135th Indian Oil Durand Cup kan long naduh ka 25 tarik Naitung haduh ka 23 tarik Nailar ha kylleng ki madan ialehkai ka West Bengal, Jharkhand, Assam, Manipur bad Meghaya.
Ka JN Stadium, Shillong kan ioh pynlong haduh 8 tylli ki jingialehkai ba kynthup ia ka Quarterfinal bad Semifinal.
