Shillong, Naitung 11 : U Myntri Rangbah Conrad K Sangma ha ka sngi Saitjain, ula pyniaid ia ka jingialang bishar kam bad ki Deputy Commissioner lyngba ka video conferencing, ban shim jingkhein ia ki jingktah jong u lapbah bad ban bthah ia ki bor District ba kin shimkhia bad ai ia ki lad jingiarap.
Kat kum ka jingiathuh ka Meghalaya State Disaster Management Authority (MSDMA), 32 tylli ki Shnong ha kylleng ka Jylla kila shah ktah na ka jingther u slap ha kane ka taiew ba nyngkong u bnai Naitung.
Ki jingjia, khamtam eh ha ri-lum Garo bad katto katne ki bynta ka ri-lum Khasi, ki kynthup ia ki jingtwa khyndew, ka jingtuid ka khyndew, bad ka jingpoi umsaw ha ki wah bad wahduid. Ym shym la don kano kano ka jingjia ba sngewsih ha kine ki jingjia.
Da ka jingbuh ka Meteorological Department ia ka Meghalaya hapoh ka Orange alert bad iathuh lypa ia ka jingther u slap ha kylleng ki jaka kaba lah ban bteng haduh ka 15 tarik Naitung, u Myntri Rangbah ula bthah ia ki bor district ba kin long kiba peitthuh bha.
U Conrad ula ban jur ia ka jingdonkam “ka jingiatreilang kaba iajan hapdeng ki bor district, ki kynhun ai jingiarap ba don ha ki Block bad kiwei ki tnad ba dei khmih, khnang ban pynthikna ia ka jingshimkhia ban leh eiei mardor haba don kino kino ki jingjia.
Halor ki jingtei, u Myntri Rangbah ula bthah ban buh hakhmat eh ia ka jingpynbha biang ia ki surok kiba la shah pynjulor ha u slap. Ula shong bishar ia ka jingshah rong khyndew ha ka lynti sha ka Mineng Bailey Bridge kaba don marjan ka Gasuapara, South Garo Hills, ha kaba la pyrrkhing ba tang ki kali rit ki lah ban iaid kata ruh hapdeng ka jingphikir bha.
U Conrad ula bthah ban leit jngoh bad ban shna pynbha biang shipor ia ka surok kham kloi kat kaba lah.
Ula bthah ruh ban pynpoi ia ki song jingiarap sha ki longiing kiba shah ktah khlem ka jingpynslem, pynpoi ia ki marbar bad ki jingai jingshakri haba bthah ruh ia ki bor district ba kin peitthuh bha ia ka jinglong jingman da kaba ai jingtip ba man ka por sha ka Sorkar Jylla.
La bthah ia ki paidbah ba kin long phikor bha da kaba kiar ban iaid lynti na ki jaka ba jur ka jingtwa khyndew bad ki wah kiba shlei um, da kaba burom ia ki jingbthah jong ki bor district, pynkynriah noh ia ka leit ka wan ka bym da donkam na ki surok ba long riat ha ka por slap.
La bthah ruh ban phikir bha haba iadei bad ka jingpom leilieh bad pyrthat.
