Imphal, Naitung 11: Ka jingïakynad ka la khie biang ha Imphal West district ka Manipur, ha ka sngi Saitjaiñ hadien ba ym duna ïa ka saw tylli ki ïing kiba la ieh da ki trai kiba dei jong ka jaidbynriew Meitei, ki la shah thang ha ka kynhun ki briew na ka thaiñ Kangpokpi District kaba don marjan bad ki shnong kiba bun ki jaitbynriew Kuki, ïathuh ki heh sorkar.
Kane ka jingjia ka la jia ha ka por 12.30 baje mynstep ha Kanto Sabal, ka jaka ba marjan bad ka khappud bad ki jaka lum kaba dang sahkut naduh ba la mih ka jingïakynad bad ka jingia umsnam hapdeng ki ar jaitbynriew ha u bnai Jymmang 2023.
Katkum ki heh ophisar, kitei ki iing ki la sah thylli naduh ba ki nongshong shnong ki la phet krad ha ka por ba sdang ka jingia-umsnam hapdeng ki ar jaitbynriew.Ka thaiñ ka la sakhi ruh ïa ki jingïasiat suloi hapdeng ki kynhun lehnoh na ki jaidbynriew Meitei bad Kuki ha u snem 2023 bad 2024.
Katba ka khubor jong kane ka jingthang iing ka la nang saphriang, ki paidbah kiba bun na ki jaka ba marjan jong ka Meitei ki la pyrshang ban ïaid paidbah sha Kanto Sabal hynrei la pynsangeh ïa ki da ki shipai bad Central Armed Police Force, kaba la pynmih ïa ka jingïakynad bad ki bor pahara.
Ki bor pahara ki la siat da ki bom sat khmat (tear gas) ban pynpra ia ki paidbah bad ban iada na ka jingjur shuh shuh, la iathuh ki heh ophisar.
Ki heh ophisar ki la kynnoh ba palat 200 ngut ki briew na ka jaidbynriew Kuki ki la rung shapoh katei ka jaka na ki lum ba marjan shwa ban thang ia ki iing kiba la iehnoh.Hynrei ia ka jingkam ym shym la lah ban pynshisha.
Ha kajuh ka por, ki bor pahara ki la pynlong ia ka jingkhynra kaba jur ha Ukhrul district ban lap ia kiba donkti ha katei ka ambush kaba la pyniap ia arngut ki shipai Assam Rifles ha kaba sdang jong kane ka taiew.
Kane ka jingjia kaba dang shu jia ka wan hapdeng ka jingpyrshang ba dang ïai bteng jong ki bor pahara ban pynphai biang ïa ka jinglong jingman ha kane ka jylla kaba la shah ktah ha ki jingshah thombor, ha kaba ka jingïakynad hapdeng ki jaitbynriew Meitei bad Kuki ka la bteng naduh u bnai Jymmang 2023.
