Aizawl, Lber 12: U Myntri Rangbah ka Mizoram Lalduhoma, u la pynpaw ka jingsngewkhia halor ki khubor ba ki shipai mercenaries na ri sepngi ba kynthup ïa ki nongiakhun ha ka thma Russia bad Ukraine, kila wan rung sha Myanmar lyngba ka jylla Mizoram ban hikai ia ki riewkiengatiar ki ba ialeh pyrshah ia ka jingsynshar shipai ha Myanmar.
U Lalduhoma u la pynpaw ia kane haba kren ha ka ïingdorbar kaba don 40 ngut ki dkhot ha kaba u la ong, “Ngi don ïa ka jingtip ba thikna lyngba ka bor syntiat ba ki shipai mercenaried ba wan na ka ri Ukraine ki la leit sha ka Jylla Chin jong ka Myanmar lyngba ka Mizoram ban hikai pyntbit ïa ki kynhun kiengatiar kiba ïakhun pyrshah ïa ka bor synshar shipai.”
Hjur u Lalduhoma u la ong, Ka jingïakynad hapdeng ki ri ka pyrthei ka lah ban poi ne par shaduh ka jylla jong ka thain shatei lam mihngi jong ka ri India, bad u la kdew ruh ïa ka jingkiew kynsan jong ki nongwan jngohkai pyrthei nabar ri, kynthup ïa kito kiba na ri UK bad US, sha kane ka Jylla.
U Lalduhoma u la pyntip ruh ba ki don haduh 2,000 ngut ki nong sepngi kiba la wan kum ki nongjngoh kai pyrthei ha ka Jylla hapdeng u bnai Jylliew bad Nohprah jong u snem 2024, “hynrei ym ju ïohi ïa ki nongjngohkai pyrthei nabar ri ha ki surok jong ka Aizawl” u la ong.
Shuh shuh u la kdew ruh halor ka jingshah kem jong u nongshong shnong jong ka ri Bilat, u Daniel Newey, ha ka kad liengsuiñ Lengpui, ha ka 19 tarik u Jylliew jong u snem 2024, uba la shah kem ryngkat bad ki kuli.
Ka jyla Mizoram ka ïasam ïa u pud u sam uba haduh 510 kilomitar bad ka Myanmar bad da ki hajar ngut ki briew kila phetwir na Myanmar ki la wan rieh tngen sha Mizoram kum ki nongphetwir.
