Shillong, Risaw 19: Ka Shillong Lajong Football Club hynne ka sngi Saitjain, kala pyntip ba u Birendra Thapa ula wanphai biang sha ka Club bad yn shimti kum u Assistant Coach na ka bynta ka lympung iakhun ia ka I League.
U Birendra udei u nongialehkai barim jong ka Shillong Lajong bad ula long kum u Coach naduh u snem 2013 haduh u snem 2019 bad hadien kane ula leit ban pyniasoh noh bad ka Mohammedan SC ha u 2019 bad Sreenidi Deccan ha u 2021.
Ka jingwan phai ka jong u Birendra kan wanrah ia ka jingshemphang bad jingshit rhem biang jong Shillong Lajong ha ka jingiakhun ia ka I League khamtam haba u don iaka sap kum u Coach.
Kum u nongialehkai uba tbit bad uba sngewthuh bha ia ka jingthrang jong ka club, u Birendra u don iaka thong ban bting ia ka kynhun ban long kaba seisoh ha ka jingiakhun ha kane ka samoi kaba mynta.
