Shillong, Lber 31 : Ha ka jingjop ka ban sah jingkynmaw ha ka jingialehkai phutbol ka Jylla bad ka Ri India, ka kynhun U-17 jongka Mynken Christian Higher Secondary School, Ri-Bhoi District, kala ioh khur ia ka nam ba lai ha ka lympung ialehkai Indo-French Football Tournament, kaba long ha Paris.
Kane ka lympung ialehkai ka dei kaba ar bala pynlong hapdeng ka Ri India bad ka France bad la pynlong ia ka naduh ka 25 tarik Lber haduh ka 29 tarik u Lber.
Ka kynhun kala ioh ia kane ka kyrdan ha kane ka lympung ialehkai ka pyrthei lyngba ka jinglah ban ialehkai bha kum ka runners-up jong ka Subroto Cup 2024.
Ka jingiaid lynti jong ka sha ka phainal ha ka Subroto Cup, ka kynthup ia ka jingjop ba 23-0 kol pyrshah ia ka Daman & Diu bad 7-0 kol ha ka semifinal bad kut ha ka penalty shootout ba 4-3 kol pyrshah ia ka Manipur ha ka final.
Shuwa kane ka jingleit ialehkai sha Paris, ka kynhun kala leit sha ka jingkilan met kaba bniah bha hapoh ka jingkhmih jong u Bah Bobby L Nongbet, Head Coach (AFC –A Licence), Bah Kitborlang Kharlukhi, Coach bad Bah Carmelius Ramshon, Manager.
Ia kane ka kynhun ba 16 ngut, la bei tyngka da ka Sorkar Meghalaya ba kan leit iakhun pyrshah ia ki Club ba khlain jong ka France kiba kynthup ia ka FC Versailles kaba wan ha ka kyrdan ba nyngkong, ka Sarcelles FC kaba wan ba-ar bad ka Meghalaya FC kaba wan ba-lai lem bad ka Gringny DC kaba wan ba-saw.
Wat hapdeng ka jingiakhun kaba jur bha, kine ki khlur ialehkai ka Meghalaya kila pyni ia ki sap ialehkai kiba tbit bad ka mynsiem ialeh ban ioh jaka lem ha ka rynsan ban pdiang ia ka khusnam.
Kane ka jingjop kaba pawnam ka long ka dak kaba kongsan bha na ka bynta ka phutbol ha Meghalaya bad ha India. Ka jingïalehkai jong ka kynhun ha kane ka lympung ïalehkai ka pyrthei ka la ai mynsiem ïa ki nongïalehkai samla kiba bun bad ka la pyni ïa ka jingroi jong ka sap ïalehkai phutbol ha ka ri India.
