Shillong, Rymphang 19: U Myntri Rangbah ka Jylla Conrad K Sangma hynne ka sngi Balang, u la plie paidbah ia ka Apollo Trinity Medical Centre ha nongbah Shillong.
Ia kane ka jingplie la sakhi lang da ka Myntri ka tnat ka koit ka khiah, ka Dr M Ampareen Lyngdoh, u Chief Secretary (CS) ka Jylla u Bah DP Wahlang bad u Regional CEO East jong ka Apollo Hospitals Enterprise Limited u Rana Dasgupta.
Ia kane ka Health Center la plie haka jingiatreilang bad ka Apollo Hospitals Enterprise Limited.
Haba kren ha kane ka sngi u Myntri Rangbah ka Jylla, u Conrad K Sangma u la pynpaw ïa ka jingsngew sarong kaba khraw ban sakhi ïa ka jingpyndep ïa ka Apollo Trinity Medical Centre.
U Conrad u la ban jur ia ka jingangnud jong ka Sorkar Jylla ban pynjanai ia ki jingshakri ha ka koit ka khiah, da kaba pynpaw ba ka Meghalaya ka pynlut haduh 9% na ka mang tyngka ha ka tnad koit ka khiah bad ka dei ruh ka bhah kaba heh tam ha ka Ri.
U la kubur ïa ka jingdonkam ban ïoh ïa ki jingshakri kiba kham bha ban wad bniah ïa ki jingpang bad pynpaw ïa ka jingkyrmen ba kane ka jaka thymmai kan ïarap ban pynduna ïa ka jinglut jingsep ki nongshong shnong kiba ju leit shabar jong ka Jylla ban leh ia ki test jingpang bad ban shah sumar.
“Ka tnat ka koit ka khiah ka la long kaba kongsan tam na ka bynta ka Sorkar jong ngi. Naduh ka koit ka khiah ha ki thain nongkyndong haduh ki jingtei ha ka liang ka koit ka khiah, ngi la kiew bha. Kane ka jaka kan pyndap ïa kiba bun ki jingduna ha ka rukom sumar jong ngi bad kan wanrah ïa ka jingsumar kaba bha sha ki paidbah” la ong u Conrad.
U Conrad u la kren ruh shaphang ki jingthmu ban pynbha ia ka koit ka khiah ha ka Jylla, kum ka jingpynrung kam ia ki 500 ngut ki doktor, ka jingpyndonkam daki bor Solar haki sub-center bad ka jingpynlong digital ia ki kot ki sla jong ki nongpang.
U la ban jur ia ka jingdonkam ban wad bniah bha ia ki jingpang bad ban sumar ia ki nongpang, da kaba kyntu ia ki nongtrei ka koit ka khiah ha katei ka jaka sumar ban pynthikna ia ka jingshakri kaba don ka jingsngewrit.
Ha ka jingkren ka myntri ka tnat ka koit ka khiah, ka Dr Ampareen Lyngdoh kala ban jur ia ka jingdonkam jong kane ka jaka sumar, da kaba kdew ba ka jinglut ka long kaba heh ha ba leit shabar ka Jylla bad ka jingkit kaba khia ha ka liang ka pisa tyngka na ka bynta kiba bun ki longïing.
Ka la pynpaw ba kane ka jaka kan ai jingkyrmen ïa kito kiba donkam jingïarap, da kaba pynthikna ba ka jingsumar pang kaba bha kan don hapoh ka Meghalaya hi.
Ka Apollo Trinity Medical Centre ka dei kaba la pyndap da ki lad jingsumar ba kham tbit kynthup ka diagnostic services, kynthup ka ECG, TMT, echocardiography, pulmonary function tests (PFT), ultrasound, X-ray, dental care, ophthalmology, physiotherapy, integrated lab kaba treikam lang bad ka Apollo Diagnostics.
Ka tnad Radiology ka don ka jingiasoh bad ka Apollo TeleRadiology International, kaba pynthikna ia ka jingiasyllok bad ki kaiphod jong ki riew shemphang.
Ha ka bynta kaba ar jong ka jingpynheh, yn pynrung ia ki jingshakri jong ka jingsumar kum ka dialysis, endoscopy, CT scans, bad MRI.
Yn pynmih ruh iaka App ba kyrpang na ka bynta ki nongpang ban buh por kynduh ne Appointment Bookings, Home Sample Collections.
Kane Center kan don ruh ka jingiasyllok lane ka Telemedicine Consultations bad ki stad ka Apollo na Chennai, Hyderabad, Delhi, Kolkata, bad Guwahati.
