Shillong, Jymmang 29 : U Myntri Rangbah ka Jylla Conrad K Sangm ha ka sngi Palei ula pyntip ba ka jingia wad ia ki shikurim na Indore, Madhya Pradesh, kiba jah ha Sohra, kala jur bha mynta bad iathuh ba ki Shnong ki Thaw jong ka thain kila wan iasnohkti lang ban iarap ia ki bor Sorkar ha kane ka jingwad ia kine ki shikurim.
“Ka jingjia kaba sngewsih kala jia ia ki arngut ki shijur na Madhya Pradesh, kiba la wankai sha Meghalaya khamtam ha thain Sohra” ong u Conrad haba bynrap “Ngi la ioh ia ka khubor ba kila jahrngai. Ka dei ka jingjia kaba sngewsih. U Myntri Rangbah ka Madhya Pradesh ula kren ia nga bad nga la ioh ruh ia ka phone call na ka Ministry of Home Affairs. Nga la shimti hi halade ban peitthuh ia ka jinglong jingman ba manla ka sngi”.
Haba kren sha ki lad pathai khubor halor ki kam ban iawad ia kine ki shikurim, u Conrad ula ong “U Superintendent of Police, ki bor Districtbad ki Pulit kila trei khlem shongthait ban lapdien ia kine ki shikurim. Ym tang ki bor Sorkar hynrei wat ki shnong ki thaw bad ki nongshongshnong ka thain, kila wan iashimbynta lang ha ka jingiawad”.
Ula bynrap “Ngi la pyndonkam lut ia baroh ki kor kiba don bad ngi ban iarap ia ka jingwad. Hynrei, kane ka dei ka aiom slap bad ka thain baroh kawei ka dei kaba jur slap, kaba buh jingeh bha ia ka kam. Hynrei ngi la pyrshah kat kaba lah ban pynthikna ba ngin lap iakine ki shikurim”.
U Conrad ula pyntip ba ia ka scooty jong kine ki shijur la lap bala ieh harud surok, kaba pyni ba lehse ki lah ban leit iaid sha kawei na ki jaka iaid kai ba long riat ha ka thain. Kine ki jaka iaid, u batai, ki long kiba ma bha khamtam ha kane ka por slap namar ba ka syntuid bha.
U Myntri Rangbah ula pynpaw ruh ia ka jingkyrmen ba ki jingpyrshang baroh kin long kiba seisoh. Ula iaroh ia ka jingaiti jong ki trai shnong, kiba la wan iasnohkti lang ha ka jingiawad bad niew ia kine ki nongwanshangkai kum ki parajait parakhong.
“Man ki shnong ha ka thain kila wan shakhmat ban iarap” ong u Conrad haba pyntip “Kila iatreilang ha ryngkat bad ki bor Sorkar khlem ka jingshongthait”.
Ula ban jur ba ha Sohra, ia ki nongwan shangkai la niew kum ki bahaiing hasem bad ia kane ka jingsngew la iohi shai na ka jingiamih u paidbah ban iawad ia kine kiba jah.
