Shillong, Jylliew 21 : Ka ophis u District Sports Officer West Khasi Hills Nongstoin lyngba ka Mission Football Meghalaya kan pynlong ia ka jingjied ia ki heprit kynthei bad shynrang kiba don sap ha ka jingialehkai phutbol kiba don ha ka rta kaba 6 – 12 snem. (Kata kiba kha ym dei shwa la 01/01/2011 bad ym dei hadien ka 01/01/2016).
Kane ka jingjied ia ki nongïalehkai ka long ban pynrung pat ia ki ha ki Grassroot Centre bapher bapher kaba la buh thong ban sdang naduh ka 01tarik Naitung 2022.
La pyntip ruh ba na bynta ka Mairang GRC ka jingjied ia ki nongïalehkai kan long ha ka 25tarik mynta u bnai ha Madan Mairang Mission, na bynta ka Markasa Centre ruh kan long ha katei kajuh ka sngi ha madan Domsohphlang Markasa, na bynta ka Nongthliew Centre kan long ha Madan Umthlong bad na bynta ka Kynrud Centre pat kan long ha madan Kynrud.
La kyntu ia ki Heprit haba ki wan sha katei ka lympung ban shah jied ki dei ban wanrah ia ki kot Sngikha, nangta ki medical certificate, ar tylli ki dur bad ruh ki tiar ialehkai. La kyntu ruh ia ki kmie ki kpa ba kin wan ïalam hi ia ki khun sha katei ka lympung.
