Shillong, Naitung 07 : Ka Sorkar Jylla kala wad mynta ia ki buit kumno ban lah pynmih ia ka bording elektrik na ki niut bad ki jaboh jabain.
U Myntri kam pynmih bording Abu Taher Mondal haba iakren bad ki nongthoh khubor ula iathuh ba u Myntri Rangbah ka Jylla Conrad K Sangma u dang iakren mynta bad ka National Thermal Power Corporation (NTPC) halor kane ka kam.
“U CM ula iakren bad ka NTPC namar ka NTPC ka don ia katto katne ki project ba pynmih bording na ki niut. Namar kata, ngi ruh ngin pyrshang ban wad ia ki buit” ula ong.
U Myntri ula pyntip ruh ka jingiakren kala iaid halor ka jingwad ia ki lad ki lynti ban pyndonkam ia ki jaboh jabain sha ka jingpynmih bording elektrik.
“Ngin sa shong jingialang bad ka Tnad Urban Affairs ruh ban iakren ia kane ka kam” ula ong haba bynrao “Mynta ka sngi ngin sa iakren ruh halor kane ka bynta bad ta ka daw nga ong ha phi ba halor kane ka bynta, lehse ngi lah ban leh eiei”.
U Myntri Rangbah dang ha kine ki khyndiat sngi, ula pyntip ba ka Jylla ka donkam haduh 1700 million unit ka bording manla u snem ha kaba ka Jylla ka dang lah ban pynmih tang 1000 haduh 1100 million unit…ta ka daw, kala don ka jingduna ka bording kumba 600-700 million unit.
“Ia kane ka jingduna la pyndap da ka bhah ba ioh na ki central agency bad kaba duna pat lah shu thied na iew. Namar kata, kane ka dei ka jinglong jingman ba mynta” ula ong.
Pule lang ia kane: Shah wiang ding ka kali Pulit ha Laitumkhrah Police Station ba shah shoh ki Khynnah Khasi
