Shillong, Jan 5: Ka Meghalaya kala shah pynliem noh hynne ka sngi Thohdieng ha ka Manipur ha ka Final jongka plate group jongka U-16 boys’ Vijay Merchant Trophy kaba la long ha Jamshedpur.
Kane ka jingialehkai kaba 3 sngi kala sdang ha ka sngi Balang ha kaba ka Meghalaya kala jop iaka toss ne jingkynting pisa bad kala jied ban tied nyngkong.
Ka Meghalaya kala tied nyngkong bad kamai 111 run bad hap lut ki nongtied katba ka Manipur kala tied 293 run, haba ka Meghalaya kala leit ban tied ha ka sien ka baar kala kamai tang 147 run bad hap lut ki nongtied bad kala pynlong iaka Manipur ban jop da 35 run khlem da donkam shuh ban tied ha ka sien ka baar.
Ka Manipur kadei ka kynhun kaba khlain ha kane ka samoi ialehkai ha kaba kala dep ruh ban pynrem teng ia ka Meghalaya ha ka Round Robin.
Ha ka jingiakhun kaba mynta, ha ka kynhun jong ka Meghalaya ki nongtied kiba la ialehkai bha dei tang u Rudra Singh Rathore ula kamai 49 run bad u Dipayan Nandi ula kamai 55 run, katba ki nongkawang bol kiba ialehkai bha ki kynthup ia u Aashish Kumar Lohar bad u Apandanka Marak kina la ioh mar 3 wiket.
U Dipayan udei u nongtied uba la kamai run bun tam na ka bynta ka Meghalaya ha ka Tournament ha kaba ula kamai 393 run bad ioh 4 tylli ki Half Century ne 50 run tam.
U Apandanka Marak ula wan hakhmat ehnkum u nongkawang bol hapoh ka ri ban khur bun wiket ha kaba ula ioh khur 48 wiket, katba u Gaurav Jyoti Thakuria ula ioh 31 wiket.
Watla ka Meghalaya kala ialehkai bha ha kane ka Tournament da kaba mad nyngkong iaka jingrem ha ka Sikkim bad hadien kane kala iakhiad bad ka Nagaland bad ka Meghalaya kala pynrem ia ka Arunachal Pradesh bad Mizoram bad kala shah pynrem ha ka Manipur ha ka jingiakhun kaba khatduh jong ka Round Robin hynrei kala ioh pat ban rung sha ka Semi Final bad kala pynrem ianka Nagaland ban ioh rung sha ka Final.
