Shillong, Rymphang 08 : Ka Uttarakhand ka dei ka Jylla ba nyngkong eh ha India ban mynjur ia ka Uniform Civil Code (UCC), ka ban sa long mynta kawei ka ain ia ka kam iakyntiew kurim, ka kam iapyllait sanshyieng, ka jingai teng ia ki nongkynti bad kiwei kiwei. Ka don ruh ia ka kdew ba kyrpang ba ka UCC kan ym treikam satia ia ki Scheduled Tribe (ST).
Ha Meghalaya, kala don ka jingpyrshah kaba jur halor ka jingtyrwa ban pyntreikam ia ka Uniform Civil Code hynrei lada iaid kat kum ka lynti bala shim da ka Uttarakhand, la iohi ba ki ST ha kano kano ka bynta jong ka Ri, kin lait na ki jingshah teh shah khun ha ki kyndon ka UCC.
Hynrei, ka dang kloi palat ban batai lypa ia kaei kaei baroh.
Ka Meghalaya ka dei ka Jylla ba shongshnong bun eh ki riewlum bad ki jingsngewkhia jong ka ban pyntreikam ia ka UCC ka dei kaba la pynsngew da ki kynhun bapher bapher. U Myntri Rangbah Conrad K Sangma ula kiar ban ai kano kano ka jingkynthoh namar um pat iohi satia ia kaei kaba don ha ka UCC. Hynrei, naba ka UCC Bill 2024 ka Uttarakhand, kala don mynta ha rynsan u paidbah, ki jingai jingmut bad jingpynsngew ki lah ban mih na ki kynhun bapher bapher.
Ka imlang sahlang hi ka don ia ka jingsngew rit mynsiem halor ka jingpyntreikam ia ka UCC ha baroh kawei ka Ri. Hynrei, lada ngi dei ban shim ia ka UCC Bill ka Uttarakhand, la iohi ba ka don ka khubor kaba bha ia baroh ki Jylla kiba shong shnong da ki ST kynthup ka Jylla Meghalaya.
Ka Meghalaya ka don ia lai tylli ki paid riewlum ba heh paid, ki Khasi, Jaintia bad Garo bad bun bah ki riewlum rit paid kum ki Bodo-Kachari, Hajong, Koch, Mann bad Rabha. Ka dei riti tynrai bad ki jingleh rukom nala tynran jong baroh kine ki paid riewlum ki iapher kawei na kawei pat.
Mynta, kaei kaba ka UCC Bill 2024 jong ka Uttarakhand ka ong, ba ki ST kum ki Jaunsaris, Bhotiyas, Tharus, Buksas, Rajis, Jads bad Banrawats kiba don haduh 2.89 percent ka jingdon paid ha ka Jylla Uttarakhand kin lait na ka jingshah kdup lang ha kane ka Ain.
Ka jingtreikam jong ka Cose sha ki Schedule Tribe : Kiei kiei kiba don ha kane ka Code kin ym treikam sha ki dkhot jong kini kino ki Scheduled Tribe hapoh a jingmut jong ka clause (25) jongka Artilce 366 pule lang bad ka Article 342 jong ka Riti Synshar ka Ri India bad ki briew lane ki kynhun kiba ki hok tynrai jong ki la iada hapoh ka Part XXI jong ka Riti Synshar ka Ri.
Na ka bynta ka jingpyndonkam salondar, ka UCC Bill ka kren ia ka ain ba treikam kumjuh ia baroh ki nongshongshnong ka India bad ka bym pynshong nongrim halor ka niam haba phai sha ka kam iakyntiew kurim, pyllait san shyieng, ai pateng, ting khun nalor kiwei kiwei ki kam shimet.
Hadien ka jingioh jingmynjur na ka Iingdorbar Thaw Ain, shisien ba ka Bill ka ioh jingmynjur na u Lat, ka Uttarakhand kan long ka Jylla ba nyngkong eh hadien ka jingioh laitluid ban don ia kawei ka ain halor ka shongkha shongman, ka jingia pyllait sanshyieng, ka jaka puta, ka nongkynti, ka jingai pateng ia baroh ki nongshogshnong khlem da pyniapher ia ka jingngeit niam.
