Ujor u Ophisar MPS sha u SVO pyrshah ia u DGP bad ki Dkhot ka Inquiry Committee

Kynnoh ba pyndonkam bakla ia ka bor hapoh ka Tnad Pulit

Shillong, Jymmang 09 : U Ophisar Meghalaya Police Services (MPS) bad Assistant Inspector General (AIG) barim ka Jylla Bah GK Iangrai ula ujor sha u State Vigilance Officer (SVO) bad Chief Secretary ka Jylla Bah D.P Wahlang ba un tuklar lang halor ka jingkynnoh pyndonkam bakla u Director General of Police Dr LR Bishnoi bad ki dkhot jong ka Inquiry Committee bala thung da ka Tnad Pulit.

Ha ka shithi bala phah sha u Chief Secretary, u Bah Iangrai ula ong “La aiti ia kane ba phin tip ha ryngkat ka jingkyrpad ba phin phah tian kam bymman bad jingpynsajia na ka Tnad (Departmental action) pyrshah ia kine ki Ophisar namar ka jingpyndonkam bakla ia ka shuki bad ki kam bymman nalor kiwei kiwei”.

Ula ong ba ha ka 25 tarik Nailar, ka Ophis u DGP kala aiti ia ki kot ki sla ba iadei bad ka kaiphod bala aiti da ka Enquiry Committee sha u Secretary ka Tnad Home(Police) kaba don ia ki jingshem jong ka Committee kaba khlieh da u MK Singh (Inspector General of Police, Law & Order, Meghalaya Police) ha ryngkat u DNR Marak (Commandant, 1sr MLP Bn, Mawiong Shillong).

Kumba la iohi ha ka para 1 jong kane ka kaiphod ka Committee kala ong “Kawei ka kali Hyndai Verna kaba la pynieng ha Central Workshop ka dei kaba la ai da u nombor thok bad ym pat shym la register ia kane ka kali da u AIG A namar ym shym la don satia ki kot ki sla”.

U Bah Iangrai u ong ba ha ka 10 tarik Rymphang, 2023, haba jubab ia ki aplikeshon ba pan ia ka kaiphod jong ka Enquiry Committee ka Tnad Pulit pyrshah ia nga, ia kae ka copy la ai lyngba ka shithi ba 8 tarik Rymphang, 2023 lyngba u Superintendent, District Prison and Correctional Home, Shillong, mynba nga dang don ha ka Judicial custody.

“Kaba pynkyndit ia nga halor ka jingshem jong ka Committee ha ka para 1 ha kaba la kynnoh ba ka Committee kala kynnoh ia nga ba nga ai nombor thok ia ka Hyundai Verna kaba pynieng ha Central Workshop, Bishnapur, Shillong bad haba pule bha ia ka kaiphod bad khmih ia ka annexure A serial no 77 kala don ka jingkdew ia ka kali nombor ML02-A-0001 Verna kaba don ia u Chasis No MALC841CLKM128988*B ha kaba kam shym la don ka khep ha ka por jong nga kum u AIG (A) ba ngan pyndait ia u nombor thok naba kane ka kali kam pat ju don bad nga hynrei kumba la pynpaw da ka Enquiry Committee, ia kane ka kali la pynieng ha Central Workshop kaba don ha ka jingkhmih bad jingsumar jong u In-charge ka Workshop” ula ong ha ka ujor.

“Kane ka pyni ba ka don ka jingialeh suhbuit ban pynngat ia nga da ka High Level Enquiry Committee hapoh ka jingpyniaid jong ki katto katne ki khwan/ki Ophisar ban pynthohbria ia ka kam bad ka burom jong nga” ula bynrap.

Nalor kane, u Bah Iangrai ula iathuh ba ha ka 14 tarik Rymphang, 2023 hadien ba u lait na ka Judicial custody, ula shah kem kem bad shah wanrah sha CID Police Station, Meghalaya, Shillong ban pyndep ia ki jingdonkam baroh halor ka jingshah kem.

“Kaba pynkyndit ia nga ka long ba nga iohi ia kawei ka kali Kia Carnival rong lieh kaba pynieng hakhmat ka Ophis u DGP Meghalaya, kaba iasyriem thik pa thik bad ka kali kaba kit ia u LR Bishnoi ha ka sngi ba u wan shimti kum u DGP ka Meghalaya ha u Jymmang 2022 ha ryngkat ka kynhun ki Pulit na Assam. Hynrei ia kane kajuh ka kali la pyndait pat da u nombor plate ML-02-A-0001 kaba kat kum ka jingtip jong nga bad kat kum ki kot ki sla ba nga ioh pdiang n aka Tnad Pulit bad ka Registration Certificate bala ai da ka Tnad Transport ia ka RTI ba nga pan, ka pyni ba kane ka nombor ML02-A-0001 ka dei kaba la register ia ka Verna 1.6 VTVT” ula ong.

“Hadien ka jingtrei shitom kaba la slem, nga la lah ban lum ia ki sakhi lyngba ki dur bad ki video bala ioh lum na kylleng ki jaka, ba pyni shai ba u DGP LR Bishnoi ha ryngkat ka jingiasuhbuit bad kiwei ki Heh Pulit, kila pyndonkam bakla ia ka shuki da kaba leit shane shatai da ka kali ba don ia u nombor thok. Namar ngam don lad ban ioh ia ki video CCTV na ka Meghalaya Police Headquarter lane ka CID Police Station ban pynshisha ba u DGP ula pyndonkam man ka sngi ia kane ka kali naduh ka sngi ba u shimti ia ka shuki DGP haduh mynta mynne namar ka jingshisha ba dang shen ka Sorkar lyngba ka Tnad Political, kala pyllait ia ka Tnad CID bad kiwei kiwei na ka jingtreikam ka RTI Act, 2005” ula bynrap.

Une u Heh Pulit MPS ula ong ruh ba ka dei ia kaban pynpaw hangne b aka jingtohkit bala pynlong pyrshah ia ka, ka dei kaba lait ruh sha ki lad pathai khubor hshuwa ban aiti ia ka kaiphod sha ka Sorkar ia kaba lah paw shai lyngba ka affidavit bala file da u Secretary ka Tnad Home (Police) hapoh ka Iingkashari High Court haba iadei bad ka PIL No 12 of 2022.