Tura, Risaw 05: U Contractor na Tura uba shah pynbor ban ai pisa bala kynnoh dawa da ka Engineer ka PHE ha North Garp Hills, ula thoh sha u Director General of Police (DGP) ba dawa ban leh tyngeh ia u Officer in-Charge ka Bajengdoba Police Station namar ka jingkyntait ban register ia ka ejahar bala ujor la palat artaiew pyrshah ia ka jingbamsap kane ka Engineer.
La kynnoh ba ki Pulit ka North Garo Hills kila leh mynthi ban register ia ka case bala ujor da une u Contractor, kaba la pynbor ia u ban leit mudui da ka mukotduma sha ka Iingkashari Meghalaya High Court.
Hynrei, u Officer in-Charge ka Bajengdoba Police Station u dang iai bteng ban pynslem ha kaban register ia ka ejahar halor ka nongrim ba u donkam ban bud ia ki lynti treikam bad shim ia ka jingbit n aka Sorkar Jylla watla kane ka jingpan jingbit ka donkam tang ha ka por ba dei ban kem ym ban register ia ka case pyrshah ia ki.
“Halor kaei ka kyndon ain lane CrPC ba u Heh Pulit u kyntait ban register ia ka case?. Kam don jingkhang sata ia ki Pulit ban register ia ka case kam bymman bad ban tohkit ia kino kino ki Ophisar Sorkar bad ka jingbym register ia ka ejahar ka dei ka jingpynkhein ia ka ain” ong u Contractor ha ka mudui bala phah sha u DGP Dr LR Bishnoi.
Ha ka shithi ujor sha u DGP bala aiti ha ka 4 tarik Risaw, ula kdew ba kat kum ka kyndon 197 jong ka Code of Criminal Procedure of 1973, kala shai ba ka jingkhang bala kdew ha kane ka kyndon ka long (i) pyrshah ia ka jingshimkhia da ka Iingkashari bad (ii) ym ban register ia ka criminal case lane tohkit da ki Pulit lane aiti ia ka kaiphod da ki Pulit hadien ba pyndep ia ka jingtohkit, kumba la batai da ka kyndon 173 jong ka Code of 1973.
U ong ba ka jingiai pynslem ban register ia ka ejahar kala buh ia ki Pulit ha North Garo Hills ha ka jinglehrain haba phai sha ka jingregister bad tohkit ia ki kam bymman khamtam lei ka jingkynnoh bamsap.
