Guwahati, Naitung 02: U Myntri Rangbah (CM) ka Assam, u Himanta Biswa Sarma u la ujor da ka mukotduma pynjah burom pyrshah ia u Deputy CM ka Delhi, u Manish Sisodia halor ka jingkynnoh donkti donkti ha ka kam bam sap ha ka ba thied ia ki tiar PPE ha ka por ka jingsaphriang jong ka jingpang Covid-19.
Ha ba kren ha ka jingialang bad ki lad pathai khubor ha katei ka nongbah, u Advocate General Debojit Saikia ha kane ka sngi Thohdieng ba la lah u la ong ba ka kashari ka la dep lypa ban phah da ka jingthoh sha u Sisodia.
“Ia ka mukotduma la rejistar hapoh ka kashari jong u Chief Judicial Magistrate, Kamrup Metro hapoh ki section 499, 500, bad 501 jong ka Indian Penal Code,” ong u Saikia.
U Sisodia u la kynnoh ba u Sarma u la ai kontrak ha ka ba iadei bad ka jingthied ia ki tiar PPE sha ka kompeni ka ba dei jong ka kurim jong u ha ka dor ka ba heh. “U Himanta Biswa Sarma u la ai kontrak sha ka kompeni ka kurim jong u. U la siew ha k dor T.990 na ka bynta kawei ka tiar PPE katba u la thied na kawei pat ka kompeni ha ka dor T.600 kawei ha ka juh ka sngi. Kane ka dei ka kam bymman ba shyrkhei,” ong u Sisoda ha ba kynnoh halor katei ka kam bamsap ha ka ba sdang jong une u bnai Jylliew ba la dep. Na ka liang u Sisoda u la kam ruh ba u don ia ki kot ki sla ban pynshisha halor kane.
Na ka liang u CM Sarma bad ka kurim jong u ka Riniki Bhuyan Sarma ki la dep lypa ban ujor da ka mukotduma pynjah burom ka ba T.100 klur pyrshah ia u Sisodia.
