Shillong, Rymphang 15 : Ki Pulit ka Meghalaya Police, kila kem haduh 14 ngut ki briew hadien ba dep ujor haduh 62 tylli ki ejahar pyrshah ia ka jingtih dewiong beain ha East Jaintia Hills District.
Ka jingkhynra ia ki kam tih dewiong beain hapoh ka District kala jur bha naduh ba jia ka jingbthei ka par tih dewiong beain ha Mynsngat-Thangsko, kaba shim iaka jingim ki 31 ngut ki nongbylla.
Kat kum ka kaiphod bala aiti haba iadei bad ki jingbishar ka National Green Tribunal (NGT), ka jingkhein bala ai kat haduh ka 14 tarik Rymphang, ka pyni ba ki Pulit kila register haduh 62 tylli ki ejahar namar ka jingsei dewiong beain, kynthup ki 5 tylli bala ujor hashuwa ka jingbthei ka par ha Mynsngat-Thangsko.
Nalor kane, sa 5 tylli ki ejahar ki dei kiba iadei bad ka jingshalan ia u dewiong bad artylli ki dei halor ka jingioh kurup ia ki bomb ba suba pyndonkam ha ka jingtih par.
Haduh mynta, 14 ngut ki briew kila shah kem naki saw tylli ki case.
Na kine, 7 ngut kila shah kem haba iadei bad ka jingbthei ka par ha Mynsngat-Thangsko bad ki dei kiba la ithuh da u Forme Chyrmang, Shameki War, Process Phawa, Tensing Suchiang, Yoomiki Syih, Ernest Swer, Rangsing Syiemlieh ba ju khot sin u Mithun.
“U Ernest bad u Mithun ki don mynta hapoh ka Police Custody” ong u Superintendent of Police ka District Vikash Kumar.
Ki briew kiba shah kem ha lai tylli kiwei pat ki case ki dei kiba la tip kyrteng da u Sahanaj Uddin bad Abansan Syrti (Umthe case), Narayan Majumdar, Salim Uddin Choudhury bad Safrul Islam Choudhury (Umpleng case) bad Rishna Sutnga bad Skhemborlang Kshiar (Umkiang case).
Ki bor Pulit kila kurup haduh 15,224.72 metric ton u dewiong bala khein, bad dang don bun kiba dang ap ban khein da ka Tnad Department of Mineral Resources.
Ka jingkurup ka kynthup ruh ia 5 tylli ki kali, 25.5 kolo u bomb gelatin bad 74 tylli ki detonator.
Ha kajuh ka por, ka Sorkar kala jer ia ka kyrteng u Judge bala shongthait RS Chauhan kum u Chairman ka Judicial Inquiry Commission ka ban tohkit ia ka jingbthei ka par dewiong ha Mynsngat-Thangsko bad ki kam tih dewiong beain ha ka Jylla.
Kumjuh ruh ka Director General of Police (DGP) kala thung ia ka Special Investigation Team (SIT) ka ban tohkit ia ka jingbthei ka par ha East Jaintia Hills.
