Shillong, Rymphang 14 : Ka Sorkar Jylla kala pynkynriah kam ia u Superintendent of Police ka East Jaintia Hills Vikash Kumar hapdeng ka khynwin bthei ka par dewiong ha Mynsngat-Thangsko, myn ha ka 5 tarik Rymphang, kaba la shim ia ka jingim ki 31 ngut ki briew.
U SP ka Anti-Narcotics Task Force Pankaj Rasgania un shimti noh mynta kum u SP ka EJH, ong ka jingpyn bna bala pynmih da u Commissioner & Secretary ka Tnad kam Pohiing (Police) Bah CVD Diengdoh ha ka sngi Saitjain.
U Vikash Kumar un shimti noh mynta kum u SP ka Anti-Narcotics Task Force, Shillong.
Kane ka hukum kala mih ruh hadien ba ka Director General of Police Kong Idashisha Nongrang, kala pynmih ia ka hukum ha ka 12 tarik Rymphang, ban thung ia ka Special Investigation Team (SIT) ba khyndai ngut ki dkhot, ka ban tohkit ia ka jingbthei kane ka par tih dewiong beain.
Ka SIT, ka ban khlieh da u Dy. Inspector General of Police (Eastern Range) Vivekanand S Rathore, kan wad bad pynthikna ia ki daw tynrai bad ki daw ba lam sha kane ka jingjia, ban tohkit ia ka jingpynkhein ia ki hukum ki Iingkashari bad ka jingbthah ka NGT bad ban aiti ruh ia ki jingshem hapoh ka por bala buh.
Ka hukum ka DGO kala bynrap ruh ba ka SIT kan pynthikna ba ka jingtohkit kan poi sha ka jingpynkut kaba don jingmut bad ka jingai ia ka jingbishar ba hok kat kum ka ain.
Ia ka jingwad ia ki briew ba dang jah la pynsangeh noh ha ka 9 tarik Rymphang hadien b aka kynhun ai jingiarap kala pyntip ba ym shuh ki briew kiba dang im.
Saw ngut ki briew kila shah kem bad ki bor Sorkar ki iathuh ba da ki hajar metric ton u dewiong beain la dep ban kurup hapdeng ka jingkhynra kaba jur sha ki jaka sah jong ki nongbylla ha ki jaka ba don ki par dewiong.
