Shillong, Rymphang 12: Ka Synjuk ki San Shnong ka Mawlai, hynne ka sngi Nyngkong, kila leit ban ujor sha ka Deputy Commissioner ka East Khasi Hills pyrshah ia ka jingiaid ki trok ba kit palat pud na surok Nongkohlew-Mawsiatkhnam- Umrynjah khamtam eh na Jingkieng Umrynjah kaba la synjor.
Kine ki san tylli ki Dorbar Shnong ki kynthup ia ka Mawsiatkhnam, Umrynjah, Nongkohlew, Umphrew, bad ka shnong Madan Mawkhar.
Haba kren sha ki lad pathai khubor, u president ka Synjuk B Thangkhiew ula iathuh ba naduh ka por ba la khang iaki trok ban iaid na jingkieng Umiam, ki trok khamtam kiba kit palat pud kila iaid na kane ka surok kaba iaid lyngba ki shnong Mawsiatkhnam, Umrynjah, Nongkohlew, Umphrew, bad shnong Madan Mawkhar ban sam lyngba sha Shillong Bypass.
U Bah Thangkhiew ula ong ba kine ki trok ki iaid na kane ka surok Umrynjah haka por da miet bad kane kala pynsniew ia ka surok, ka ban wanrah jingeh kaba khraw ia ki nongshnong shnong.
Ula ong ba ka jingkieng Umrynjah kaba don marjan ka Umroi Airpot, ka dei kaba rit bha bad kabym lah satia ban kyrda lada ki trok ba kit palat pud ki iaid na kane ka jingkieng. U ong ba kan poi kawei ka sngi ba kane ka jingkieng ruh ka sniew noh.
“Ka jingiaid ki trok kit palat pud na kane ka surok kala pynsniew haki katto katne ki bynta jong ka surok hynrei kaba kham ma, ka mih ioh ka sniew sa ka jingkieng Umrynjah namar kadei ka jingkieng kaba la shna la slem bha” ong u Bah Thangkiew.
U Bah Thangkhiew ula ong ba kum ki nongialam shnong, ki sngewkhia halor kane bad dei namar kane kila wan ban ujor shaka DC ban tuklar mardor.
Haba kylli u bah Thangkhiew ula ong “Naka liang ka DC kala kular ban shim khia ia kane ka kam, bad kala shim ka jingkitkhlieh ban pynbeit ia kane ka kam kham kloi khnang ba kan nym wanrah ka jingeh iaki paidbah kiba don ha kine ki 5 tylli ki shnong”.
