Shillong, Rymphang 12: Ka United Democratic Party (UDP) hynne ka Sngi Nyngkong kala dawa ba dei ban pynshitom ia ki shipai BSF kiba la thombor ia u phisar jongka tnad Animal Husbandry bad Veterinary.
Kane ka jingjia kala jia ha ka shnong Muktapur kaba hap hapoh ka Amlarem Block ha West Jaintia Hills District haka 11 tarik u Rymphang.
Ha ka kyrwoh khubor u General Secretary ka UDP u Bah Jemino Mawthoh ula ong ba ka seng ka pynrem jur ia kajingleh donbor jong ki shipai BSF pyrshah ia u ophisar sorkar.
Ula ong, hadien ka jingmih ki khubor kiba la saphriang ha ki rynsan social media, u ophisar ula shah thombor bad shah tohkit bad ula shah bthah ba u dei ban law lyngkhuid. Ki BSF kila byrngem ruh ban siat ia u ophisar ha ka thaiñ khappud jong ka ri India bad Bangladesh.
U Bah Mawthoh ula ong, kane ka jingleh jong ki BSF kiba dei ban ai jingiada bad jingshngain ha ki thain khappud kala buh ha ka dur kaba sniew ia baroh ki shipai. Kane kaj ingleh khlem akor ki BSF ka long kaei kaei kaba bym iahap satia bad ka bym lah ban pdiang.
U Nongialam ka UDP ula ong ba ka seng kan ym shim sting ia kane ka kam hynrei kan pynsngew ruh ha u Director General ka BSF bad BSF Vigilance Department ban phah tohkit halor katei ka jingjia bad ban pynshitom ia ki shipai kiba la iaid palat pud ban thombor ia u ophisar jong ka sorkar jylla.
“Kum ia kitei ki jingjia la dei ban shu kiar da kaba suk ban ioh ia ka jingshaniah na ki paidbah kiba shong ba sah ha ki thaiñ khappud bad ki shipai khappud kila dei ban tehlakam ialade haba ki leh ia kano kano ka kam kaba iadei bad ki paidbah kiba sah ha ki thaiñ khappud” ula ong.
 hynne ka Sngi Nyngkong kala dawa ba dei ban pynshitom ia ki shipai BSF kiba la thombor ia u phisar jongka tnad Animal Husbandry bad Veterinary.){kind=link}