Nongstoin, Lber 5: Ka kur Kharbani napoh Pathew Eastern West Khasi Hills ha ka sngi hat majai, kala ujor ejahar biang sa kawei pat halor ka jingshah pyniap dusmon u Nongniah kali Tourist Taxi samla Macborn Bonnyson Kharbani, kaba la jia ha ka shiteng synnia jong ka 3 tarik mynta u bnai.
Kat kum kane ka ejahar la dawa na ka ki bor jong ka ain ban thwet bad kem lut ia baroh kiba donkti lang ha ka ban pyniap ia utei u samla.
U Bah S.Kitbok Kharbani uwei na ki samla rangbah jong ka kur, u la iathuh ba ka kur Kharbani ka la buh biang sa ia kawei pat ka ejahar hakhmat ki pulit, hadien ba ka kur ka la ioh biang sa ki katto katne ki sakhi ba u ba leh ia kane ka kam pyntriem um dei tang uwei, hynrei dang don shuh shuh kiba donkti.
U la ong ba ka kur ka la ioh ruh ia ki phone call record kiba pynshisha ba ki dang shuh shuh sa katto katne ngut ki briew, kiba donkti ha katei ka kam pyntriem pyrshah ia u Macborn Bonnyson Kharbani.
Ha ka juh ka por u la kyntu ruh ia ki paidbah nongshong shnong kiba lah ban iohi ia kane ka jingjia, ba kin wan shakhmat ban iasnohktilang bad ka kur Kharbani, na ka bynta ban rat diengkhong ia kine ki kam sniew hapoh jong ka dong ka thain baroh kawei.
Ka kur Kharbani ka kyntu ruh ia ki bor jong ka ain ba kin leh da kaba tyngeh, da kaba kin kem lut ia baroh kiba donkti bad dei ban pynngat bad pynshitom tyngeh katkum ka ain.
Ha kane ka jingleit buh ejahar,la don da kiba haiing hasem u samla Macborn Bonnyson Kharbani, ki nongialam jong ki kynhun sengbhalang bapher bapher ka West Khasi Hills.
