Nongpoh, Nailur 12: Ka Hynñiewtrep Integrated Territorial Organization (HITO) Byrnihat area mynta ka sngi ka la ujor sha ki bor pynïaid district ka Ri Bhoi pyrshah ïa ki nongpynïaid ka kompani bar jylla ba la khlieh da u Utam Zunzunwala namar ka jingtih khyndew khlem akor haduh ba ka ktieh ka la pynthud ïa ka leit ka wan u paidbah ha ka thaiñ Narbong, Umjojwa, Byrnihat.
Katkum ka jingïathuh da u samla Kapil Kurbah, President ka HITO Byrnihat, u la pynpaw ba ka seng ka dap da ka jingsngewkhia kaba jur halor ka jingtih khlem akor jong ka kompani u Utam Zunzunwala ïa u lum harud u surok shnong ka Narbong Umjojwa bad khlem da bud thik ïa ki jingbthah ban ïada ïa ka ktieh ba kan tuid sha surok khamtam ha ka por slap.
U la ïathuh ruh, ba kane ka jingtih khyndew kaba la long khlem akor haduh katta katta namar ka la wanrah ïa ka jingeh kaba khraw ki paidbah nongleit nongwan khamtam ki khynnah skul kiba hap ban ïaid na katei ka jaka.
“Ngi na ka seng ngi la leit ban jurip ïa katei ka jaka bad ban kynduh ïa u Zunzunwala hynrei um shem la kren shai eiei halor ka jingtih khyndew ha Narbong Umjojwa” ula iathuh.
Kumta na ka liang ka seng ka la ujor noh sha ki bor pynïaid district ka Ri Bhoi District bad la kyrpad ia u Deputy Commissioner ban shimkhia bad ban phah tohkit bad ruh ban weng ïa ka jingeh ka leit ka wan u paidbah baroh ha katei ka thaiñ.
