Nongpoh, Naitung 23 : Watla ka Ri-Bhoi District ka dei ka District kaba ai bording haduh 60-70% ia ka Jylla, hynrei ki paid nongshongshnong kila ud la nam tam ba kim ju ioh satia ia ka bording kaba thikna bad ka jinglip bording ka dei ka kam kaba khah khah manla ka sngi.
Kane ka sur kala mih na ka Federation of Khasi Jaintia & Garo People (FKJGP)-North Khasi Hills District, ha ka jingleit iakynduh bad ai dorkhas ia u Deputy Commissioner ka Ri-Bhoi District ha ka sngi Balang.
Kane ka Seng bala ialam da u General Secretary samla Ricky Majaw, kala pynpaw hakhmat u Deputy Commissioner ba ka jingthut ka bording elektrik ha Ri-Bhoi kala long shaba palat liam khamtam eh ha ki thain Nongkyndong, kaba la ktah haduh katta katta ia ki kam ki jam ki paidbah bad ki samla pule.
Ula ong ba ka jinglip bording kala long shaba palat wat haba slap ka bneng, ne rang ka bneng bad ki paidbah kiba siew ia ka bai bording, kim ju ioh pyndonkam thikna satia ia ka bording.
Lah ban kdew hangne, ka MeECL ka don haduh 5 tylli ki Hydro Project ha Ri-Bhoi ba kynthup ia ka Umiam Stage-I, II, III, IV bad ka Umtrew, Byrnihat, nalor ka Leshka Hydro project ha East Jaintia Hills bad ka Ganol Hydro Project ha Ri-lum Garo.
Ha kajuh ka por, ka FKJGP-NKH kala ujor ruh halor ka jingbym biang jong ka District Library kaba la plie ha kine ki khyndiat snem hapoh ka District, haba ianujor bad kiwei pat ha kylleng ka Jylla.
U President ka FKJGP-NKH ula kyntu ia u Deputy Commissioner ba un tuklar lem ha kaban kren ia ki bor ba dei peit ba kin shimkhia ha kaban pynbiang nadong hadong ha kane ka Library, ka ban long ka jingmyntoi ia ki samla pule.
