Imphal, Naitung 29 :Ka seng Congress ha Manipur ka la ujor da ka FIR pyrshah ia u president ka ka Bharatiya Janata Yuva Morcha (BJYM) Manipur unit u Barish Sharma halor ka jingkynnoh ba ki nongtrei ka BJYM hapoh ka jingialam ka jong u ki la thombor ia ka ophis jong ka party.
Ka Seng Congress ka la kynnoh ba ka ophis treikam jong ka, ka la ngat ha ka jingshah thombor ha ki nongtrei jong ka BJYM katba ki dkhot jong kane ka seng ki dang pynlong ia ka jingiakhih pyrshah Sonia Gandhi.
Mardor hadien kane ka jingjia, ki nongtrei ka Congress ka Manipur ki la leit tur paidbah hapoh ka police station ha ka sorbah Imphan ban ujor da ka FIR.
“Ngi la ai por 24 kynta ia ki pulit ka sorbah Imphal ba kin rejistar FIR pyrshah ia kito ki ba donkti ha ka ba thombor ia ka Congress Bhavan ha Imphal. Lada ki pulit kim rejistar ia ka FIR, ngin leit sha ka iingbishar High Court ka Manipur,” ong u nongialam ka Congress ha Manipur u Bhupenda Meitei.
Ka video halor kane ka jingjia ka la saphriang lyngba ki social media ha ka ba la iohi ia ki dkhot jong ka BJP youth wing ki ba dang pyrta bad byrthen ia ki nongtrei jong ka seng Congress ha Manipur.
Ha katei ka jingujor, ka Congress ka la pynpaw ba ki dkhot youth wing ka BJP hapoh ka jingialam jong u president, u M Barish Sharma ki la wan tur ha ka rukom ka ba khluit bha bad rung jubor hapoh ka phyllaw jong ka Congress Bhawan ha Imphal.
Ki nongialam ka Congress ki la kynnoh ba kine ki dkhot ka BJP ki la leh ia ka kam pyntriem da ka ba wan rung jubor, ka jingpyrshang ban pynthut ia ka shongsuk shongsain, ban pynjulor ia ki jingdon jingem, ka jingthmu ban pynmynsaw bad ban thang ia ka ophis ha Imphal.
Shuh shuh ka Congress ka la kynnoh ruh ba kine ki briew ka BJP ki la thombor ruh ia ki nongap pahara ki ba ap ia ka ophis jong ka Congress Bhavan, kata ka ba la pynthut ia ka jingtreikam jong ki bor pahara ka sorkar jylla ki ba don hapoh Congress Bhavan ha Imphal.
