Agartala, Naitung 29: Da ki spah ngut ki nongtrei ka BJP ha Tripura hynnin ka sngi Palei ki la mih sha ki surok ban pynpaw pyrshah halor ka jingkynthoh u nongialam ka Congress u Adhir Ranjan Chowdhury pyrshah ia ka president ka ba dang shu shah jied jong ka ri India, ka Droupadi Murmu da ka ba thang ruh ia ki dur tyngshop jong ki nongialam ka Congress ha Agartala.
U Chowdhury ia u ba la kynnoh ba u la kynthoh pyrshah ia ka president Droupadi Murmu kum ka ‘Rashtrapatni’ la ong ba u la pan map halor kane ka jingkren ka jong u kum ka jingbtuit thylliej.
Hynrei, watla katta na ka liang ka BJP ka la pynpaw pyrshah da ka ba pynlong ka jingiakhih bad dawa ia ka jingiehnoh kam jong u Chowdhury.
Na ka liang u Myntri Rangbah (CM) barim ka Tripura u Biplab Kumar Deb u la ong, “Wat hadien ba u dei u dkhot jong ka party ba la lamkhmat da ka longkmie, kumno u (Adhir Ranjan Chowdhury) nud ban pynmih ia ki ba kum kine ki jingkynthoh pyrshah ia ka longkmie ka ba la shimti ia ka kam ka ba hakhliehduh jong ka ri. Ka party Congress la sakhi ba kadei ka ba pyrshah ia ki trai shnong, pyrshah ia ki kynthei bad ka ba pyrshah ia ki paidbah.”
Na ka liang u general secretary ka BJP ha Tripura, u Kishore Barman u la ong ba u nongialam ka Congress, u Adhir Chowdhury u la kynthoh tyngeh ia ki nongshong shnong bad ia ki riti synshar khadar jong ka ri India.
“Baroh ngi tip ba kano kano ka jingkren bein ia u/ka president jong ka ri ka dei ka jingkren bein ia ka ri hi baroh kawei kumjuh ia ki nongshong shnong ki jong ka. Ngi la ialum lang hangne ban pynpaw pyrshah ia kitei ki jingkynthoh ba la kynthoh da u nongthaw ain ka parliament. Ngi kyrpad ia ka party Congress ba kan weng noh mardor ia u na ka kam ka ba u bat hapoh ka party,” ong u Barman.
