Pdiang burom ka UDP ia u Myntri kam pohiing barim
Shillong, Jylliew 29: Ki Nongialam ka United Democratic Party (UDP) kila pynpaw ba ka por kala poi mynta ba ki seng riewlum ki dei ban bat noh ia ka bor synshar hapoh ka Jylla ym shuh ban ailad ia ki National Party.
Kane ka sur jong ki Nongialam ka UDP kala mih na ka jingialang pdiang burom ia ka jingwan pyniasoh Bah HDR Lyngdoh, Myntri kam pohiing barim ka Jylla ba long hynne ka sngi ha Sohiong bad kaba la sakhi da ki hajar ngut ki paidbah.
Kumban shu phaidien khyndiat u Bah HDR Lyngdoh u la mih noh na ka Congress kaba u don baroh shi katta kum u MLA bad kum u Myntri ka sorkar jylla.
U Working President ka UDP, Bah Paul Lyngdoh u la ong ba ka por ka la poi mynta ba ia ka bor synshar yn bat noh da ki party riewlum.
“Ngim dei shuh ban shu bteng ne aiwai ia ka jingsynshar ha ki National Party kiba dei na shabar jylla hynrei ban shimti hi noh ki seng riewlum ia ka bor synshar,” u la ong.
U President ka UDP Bah Metbah Lyngdoh ula ong u la pyntip ba kin don bun ngut ki MLA na ki seng bapher bapher ki ban sa wan pyniasoh noh sha ka UDP ha kine ki khyndiat bnai ban wan bad ban mih iakhun ia ka elekshon MLA 2023 na ka ticket jong ka seng. Hynrei ula ong “Ka por kam pat shah ba ngin iathuh kyrteng,”.
Une u Nongialam ba hakhlieh duh ka UDP ula ong b aka jingwan pyniasoh u Bah HDR Lyngdoh kan sa kyntiew haduh kata kata ia ka UDP. U ong ba ka UDP kumba long mynta kala ioh lypa ia ka jingshaniah jong ki paidbah na kylleng ka Bri u Hynniewtrep.
U Bah HDR pat ha ka jingkren u la pynpaw ba ka jingwan pyniasoh jong u bad ki Nongialam kam dei shuh kaba rai kyrkieh hynrei kadei ba ki la da ia syllok sani bha bad ki nongkyrshan.
Da kaba pynpaw ia ka jingkmen ba u ioh ban rakhe ia ka Sngikha kaba 67 ha ka party kaba thymmai u Bah HDR Lyngdoh u iathuh ruh ba katta snem ba u don ha ka Congress kam ju don satia kata ka mynsiem shi para ne ban ialehkmen lang kumba long ha katei ka sngi.
“Nga tip skhem ba katne phi don ban kyrshan ia nga ha kine ki por baroh wat hadien ba nga la rem ka pyni ba phi dang don ka jingshaniah ia nga kum u nongialam jong phi,” u la ong.
Na ka liang kiba haiing jong u Bah HDR Lyngdoh ha kane ka sngi ki la wanphai biang ban donlang bad u hynmen wat hadien ba ki ialeh pyrshah ha u 2018.
Ia u Bah HDR ha kane ka sngi la pdiang burom da u President ka UDP ba dei ruh u Lamphang ka Ïing Dorbar Thawaiñ ka Jylla Bah Metbah Lyngdoh ryngkat ka jingdonlang u General Secretary ka party Dr Jemio Mawthoh Nalor ki MLA bad MDC jong ka party.
