Shillong, Rymphang 19: Ka jingshimkhia mardor lyngba ka CM CONNECT kala iarap ia ki nongshong shnong ha ki shnong kiba don ha ka jylla ban ioh ia u khaw rashon lyngba ka National Food Security Act (NFSA).
Ki nongshong shnong jong ka Koraibari kaba don ha ka thain Ranikor, kila ujor sha u Myntri Rangbah ka jylla Conrad Sangma halor ka jingbym ioh man la u bnai ia u khaw rashon lyngba ka National Food Security Act (NFSA) na u nongsam rashon ne na ka Fair Price Shop (FPS).
La kynnoh ba u Lipson Ch. Sangma uba dei u nongsam rashon um shim la ai rashon ia ka kynhun jong ki katto katne ki briew katkum ka hok kaba ki dei ban ioh na ka jingsam rashon. Mynshwa kala don ka jingiapait iapra bad ka jingmih kynhun ha ka shnong kaba la pynlong pat ia ki katto katne ki paidbah ban duh ia ka hok ka jong ki.
U Myntri Rangbah uba la leit jngoh ia katei ka jaka dang ha kine ki 3 sngi kiba la dep, ula pynthikna ban leh da kaba tyngeh halor kane ka jingkynnoh kiba la kynnoh da ki kynhun bapher. Ula iakynduh ia ki paidbah ka Ranikor bad pynthikna ba kin ioh ia ka hok la jong ki.
Ka Director ka Tnad Supply ka Kong Anita Kharpor, kala shimkhia mardor bad kala phah da ka jingthoh sha u Deputy Commissioner ka South West Khasi Hills bad la bthah ban pynlong ia ka jingtohkit halor katei ka kam bad ban leh ia kaba donkam.
Ha ka 17 tarik u Rymphang ka kynhun tohkit na ka Tnad Supply kala leit hiar sha katei ka shnong bad kala pynlong ia ka jingtohkit kaba bniah. Hadien kane la ioh ia ka jingpynthikna ba bun ngut kiba dei ban ioh jingmyntoi kila duh ban ioh ia ka rashon la palat shisnem bad kila don ki jingjia ba kim shim la ioh la ar snem bad la shim mardor ia ki sienjam.
La pynduh noh ia ka lisen sam rashon bad la bthah ba udei ban aiti ia baroh ki kot ki sla kiba don bad u. Nalor kane la shimkhia ruh ban wanrah biang ia ka jingiasngewthuh jingmut hapdeng kitei ki artylli ki kynhun ha ka shnong Koraibari ban pynthikna ba kan don noh ka jingbha bad ka jingbym leh shilliang khmat ia baroh.
U Deputy Commissioner ka South West Khasi Hills ula shah bthah ba udei ban pynshitom tyngeh kynthup ka jingujor ia ka ejahar pyrshah ia u nongsam rashon halor ka jingbym sam ia ka rashon sha ki nongioh jingmyntoi kiba dei hok ban ioh.
“Ka CM Connect kala pynkupbor ia ki paidbah ki jong ngi. Mynta ki paidbah kila don ia ka jingshlur ban ieng na ka bynta ka hok ka jongki. Nga dap da ka mynsiem jongka jingsngewhun ba ki btiew ki jong ngi kila lah ban ioh ia ka jingpynbeit ia ka jongeh kaba ki mad bad ka lad kaba kila ioh ban ujor kadei lyngba ka CM Connect”, ong u Conrad K Sangma.
Nalor kane ula ong, ba kum u Politishan ula ioh pdiang ia kiba bun ki jingujor bad ki dorkhas na ki paidbah kiba ula iakynduh, hynrei kam.long pat kaba lah lut ia u ne ia ki paidbah kiba la pynpaw ia ka jingsngewkhia. Ula ong, ba ka CM Connect kadei kaba la pynwandur ban long kum ka rynsan ia ki nongshong shnong ban pynsngew ia kanjingeh bad ban shimkhia ha kaban pynbeit ia kitei ki jingeh.
“Watla kan ym long kaba lah ban shimkhia lut ia ki jingeh hynrei kadei pat ka jingsdang kaba rit ka jong ngi ban ai ia ka lad ia ki nongshong shnong ban pynsngew ialade bad ban pynsngew ia ka sur ka jongki” ula ong bad ka bynrap ba ha ki shisnem kiba la dep, ka sorkar kala lah ban pynbeit ia bun tylli ki jingeh bad ia ki jingsngewkhia.
Ka jingpyniaid shakhmat ia ka CM CONNECT ka pyni ia ka jingiengskhem ka sorkar jylla ha ka kular kaba kala khlei ban pynthikna ba kin ioh ia ka marbam bad ban ai ka jongbishar kaba hok ia ki nongshong shnong khamtam eh ha ki jaka kiba don ha ki kyndong kynshrot bad ki jaka kiba eh ban poi.
Ha kaba iadei bad ka jingkylla jong ki jingjia, u Commissioner & Secretary ka tnad Food and Civil Supplies u Pravin Bakshi ula ong, “Ka Tnad Food & Civil Supplies ka pyrshang katba lah ban pynthikna ban don ka jingsam ryntih bad kaba khuid ba suba ia ka rashon khnang ba kan ym don kano kano ka jongdih rashon jong ki briew koba dei hok ban ioh. Ka jongsam ia u khaw lyngba ka ePOS ka long kaba kongsan ban pynthikna ba kiba dei ban ioh jingmyntoi kin ioh ia ki jingmyntoi kumba la bhah kyrpang na ka bynta ka jongki bad la pynlong man la ka por ia kanjingkhmih bniah”.
Ki nongshong shnong kila iaroh ia ka jingshimkhia mardor jong u Mymtri Rangbah ia ka jingeh ka jong ki.
“Ngi dap da ka jingsngewnguh ia u Myntri Rangbah ia ka jingtuklar mardor. Ngim shym lah ngeit ba hapoh 2 sngi hadien jong ka jingujor, ki heh ophisar kila wan sha ka shnong jong ngi ban pynshisha ia ka jingujor bad mardor hi kila pynduh noh ia ka lisen sam rashon. Mynta ngi lah ioh ia ka hok ka jong ngi” la ong u Secretary Shnong.
Katto katne halor ka CM Connect
Naduh ba la sdang ia ka ha u bnai Rymphang 2024, ka CM Connect kala pynwan thymmai ia ka lynti kaba ki paidbah kin iadonbynta bad ka sorkar kaba la nang kyntiew ia ka jingplie lad bad ka jingshimkhia mardor.
U soh ka CM Connect
– Ka pyniadei bad iajan bad ki 50,000 ngut ki nongshong shnong.
-La btin lynti ia ki 12,000tam ki riewshimet ha kaba iadei bad ki skhim sorkar ki bapher bapher.
La shimkhia ia jingujor na ki 2,700 ngut ki nongshong shnong.
La lah ban pynbeit ia kumba 1127 ki jingjia.
– 93.5% kadei ka jingsngewhun kaba la leh da kaba wad bniah.
.){kind=link}