Ampati, Naitung 25: U Myntri Rangbah ka jylla u Conrad K. Sangma hynne ka sngi Palei ula shah shkor ia ka jingeh jong kawei ka longkmie kaba noh rta na ka thain Ampati, South West Garo Hills bad ula pyllait mardor ia ka song pisa ba T.2 lak na ka bynta ban shna ia ka jaka ap kali ne Waiting Shed.
Ia kane la kular hi da u myntri rangbah ka jylla ha ka por ba u leit jngoh ia ka shnong Monabari ha u snem 2018.
Kane ka longkmie kaba la noh rta, kala ieng ban pynpaw ïa ka jingsngewkhia hapoh ka prokram CM-Connect kaba la long ha Ampati, ha kaba kala batai bniah halor ka jingdawa jong ka bad ïa ka jingkular ba la ai da u Myntri Rangbah ka Jylla ban ai ia ka bhah tyngka.
Mar ïa ïohsngew ïa kane ka jingujor, ka kynhun treikam jongu Myntri Rangbah ka Jylla kila lap ba kala don ka jingbhah pisa na ka bynta ka shnong, hynrei namar ba ym shim la don kiba wan shim ïa ka cheque, kumta la pynphai biang ïa katei ka pisa sha ka sorkar ha u snem 2019.
Da kaba shimkhia mardor ia kane, u Myntri Rangbah ula bthah ia ka kynhun jong u ban pyllait noh ia ka T.2 lak na ka bynta ban shna ia ka Waiting Shed ha ka shnong jongka.
Kane ka Longkmie kala ai khublei ïa u Myntri Rangbah ka Jylla ha khmat jongki paidbah baroh kiba la ïalum lang ban pynpaw ïa ki jingeh jongki ha ka prokram CM-Connect kaba la pynlong na ka bynta ka Betasing C&RD Block mynta ka sngi ha Student’s Field ha Ampati.
Ia katei ka cheque la ai ha ka kyrteng jongka Riphingkona Village Organisation.
Da kaba shim ia ka kabu ia katei ka rynsan, ki briew na ki shnong bapher bapher ki la pynpaw ia ka jingsngewkhia halor ka jingpyntreikam ia ki skhim, ka jingpynslem ban shna ia ki jingtei, ka jingbym biang ka umbam umdih, ka jingduna ki jaka pynlang um, ka jingbym biang ki surok, bad ka jingbym lah ban pyndep ia ki jingkular da ka sorkar kaba la dep.
Haba sngap ïa ka jingujor ba la pynpaw da ki paidbah, u Myntri Rangbah ula ong, “Ka long kaba kongsan ba ngi kum ka sorkar ngi ïoh ïa ka jingtip ba nyngkong eh na ki paidbah. Dei da kane ka jingthmu ba ngi la sdang ia kane ka rynsan ban sngap ia ki jingeh jong ki briew jong ngi bad ki jingbymbiang kiba lah ban don haba pyntreikam ia ka prokram, khnang ba kum ka sorkar ngin lah ban shim ia ki sienjam kiban pynbeit bad pynthikna ia ka jingai jingshakri kaba thikna ia ki paidbah”.
Ha ka CM-Connect, bun bah ki shnong kila pynpaw ia ka jingsngewkhia halor ka jingpyniasoh surok sha ki shnong jongki, ka jingpynlip ia ka bording elektrik, ka jingduna ka bording bad kiwei kiwei. Na kal iang ki ophisar kila pynshai bad pyntip ia u Myntri Rangbah halor ka jingduna jong ki nongtrei, kaba la buh ha ka jingeh ia ki ban pynbeit ia ki jingeh kiba mih ha ka tnad Bording.
“Kane ka rynsan ka pynlah ïa ngi ban sngewthuh ïa ki mat bad ban shim ïa ki lad ban pynbeit ïa ki jingeh. Nga sngewkmen ba ki briew ki mih ban kren halor ki jingeh bapher bapher. Ngim don satia kano kano ka jingbitar ruh. Lada ngi hap ban pynbeit ia ka rukom treikam, ngi hap ban iatreilang bad dei lyngba ka jingïatreilang ba ngi lah ban weng ia ki jingeh” ong u Myntri Rangbah.
Haduh palat lai kynta, ki briew ki la iai kylli jingkylli ia u Myntri Rangbah, ia kaba ula jubab bad pynthikna ba ia man la ka jingeh ba la pynsngew la pynbeit bad buh jingthoh da ki heh sorkar. Ula bthah ia ki heh sorkar ban leit jngoh ia ki shnong, ban sngewthuh ia ki jingeh jong ki bad ban pynbeit ia ki katba lah. U Myntri Rangbah ula bthah ia u Deputy Commissioner jong ka district ban buddien ia ka jingpynbeit ia ki jingeh kiba la pynpaw bad ban pyntip sha u Myntri Rangbah ka jylla ha kaba iadei bad ka jingpynbeit ia kitei ki jingeh.
