Nongstoiñ, Naiwieng 14 : Ka put ka tem ka dei ka spah bah jong ka Jaidbynriew Khasi kaba iaid lang ryngkat ryngkat bad ka kolshor hynrei katba ka por ka dang iaid, kiba bun ki tiar tem tiar put tynrai kila nang duh jait noh bad niar eh u ban tip “katno tylli ki tiar put tiar tem tynrai jong u Khasi ki don…sa katno ki dang sah mynta?”.
Kane ka dei ka khana shaphang uwei u Rangbah na West Khasi Hills, uba la wad bniah ia ka jingdon ki tiar put tiar tem tynrai u Khasi bad hadien ka jingwad bniah, ula pynlut por pat ban pynim biang ia kine ki tiar tem tiar put da kaba shna bad pynwandur ia ki thik pa thik kumba ki long.
Une u Rangbah u dei u Bah Dominik Lyngkhoi uba dei na ka Shnong Mawlangdep, kaba jngai kumba 10 Km na Nongstoin bad kaba don harud ka surok bah National Highway 44 (E).
Une u Rangbah haduh mynta ula shna kumba 35 tylli ki tiar tem tiar put nala tynrai u Khasi ba kynthup ia ki tiar tem tiar put kiba la duh jait bad ki bym lah ban iohi shuh mynta.
“Naduh ba nga dang khynnah, nga jus mat bha ban shna ia ki tiar tem tynrai kum ka Duitara, ka Sitar, ka Marynthing, ki Ktang ban put bala shna na u siej kum ka Besli, ka Tang Lot bad kiwei kiwei. Nga dei uba sngewtynnad bad ieid bha ia ki jingrwai tynrai, kiba pynkynmaw ia nga ia ka por khynnah ba nga jus mat ban put besli haba lei tap masi” ong u Bah Dominik haba iakren bad Ka Shlem.
“Ynda nga la rangbah, nga la minot thop ban shna ia ki tiar tem kiba la pyni nuksa da ki longshuwa. Nga la wad jingtip bad lum thup ia ki jait jingtem tynrai ryngkat ki kyrteng jong ki kynthup ki tiar kiba la duh jait ha kane ka pateng ba mynta” ula bynrap.
U Bah Dominik u iathuh ba lyngba ka jingtrei shitom ban wad jingtip lyngba ki jingthoh bapher bapher, kala pynlong ia u ban lap biang ia kiba bun ki jingtem tynrai kiba la duh jait kum ka Shitara, ka Ksing kaba ki riew hyndai ki khot kyrteng ka Ksing Damma.
Haba batai shaping ka ksing Damma, u Bah Dominik ula iathuh ba kane ka Ksing ka dei kaba pyndonkam da ki Syiem hyndai ban tem hashuwa ba kin mih sha ki madan thma bad haba tem ia ka ksing Damma, ki shipai jong ki Syiem kiba la pynkhreh ban leit tur sha ki madan thma, ki ju iashad iakmen, ki iarwai iasiar bad ki phawar bun rukom.
U iathuh ba kat kum ka jingwad bniah jong u, u Syiem uba pyndonkam khatduh eh ia ka ksing Damma u dei u Syiem ka Hima Myriaw bad ka Hima Rambrai kiba ieng tylli lang kawei ban ialeh thma pyrshah ia ki shipai Bilat hapoh ka jingialam jong u David Scott.
U Bah Dominik u dei ruh uwei na ki nongrwai nalor ka put ka tem bad ula ju shah khot bunsien sha ki rynsan rwai ha ka Jylla. Ma u lem bad ka kynhun jong u, kila jop teng ia ka nam lahduh ha kawei na ki lympung iapyni sap ha ki jingtem jingtem bad ka rwai ia ki sur tynrai bala pynlong ha Nongbah Shillong.
Nalor kane, une u Rangbah ula shah khot ruh la bunsien ban pyni ia ka sap jong u shabar ka Jylla kynthup ka jingshah khot ha Rashtra Pati Bhavan, New Delhi ha ka jingiakop ban pyni ia ki tiar tem tiar put tynrai.
Une u Rangbah u don ia ka jingthmu ban shna ia ka jaka buh sah jingkynmaw ia baroh ki tiar tem tiar put tynrai kaba ula shna bad pyn im biang ba kin lait na ka jingjot jingpei, hynrei kaba pyndiaw mynsiem ia u ka long ba ym don satia kiba phaikhmat ban iarap lem kynthup ia ki bor ka Sorkar Jylla ba un lah ban pynurlong ia kane ka jingphohsniew jong u.
Une u Rangbah ula pyntip ba ula ioh katto katne ka jingiarap na ka Tnad Arts & Culture hynrei ka jingioh ka dei kaba dang duna palat ban lah pynurlong ia ka jingthmu jong u.
Nalor kane, une u Rangbah ula pyrshang ruh ban thoh ia kawei ka kot ka ban ai ka jingbatai kaba bniah ia ki tiar tem tiar put tynrai kiba ula shna kynthup ruh ka jingbatai kumno ban pyndonkam ia ki hynrei kane ruh kala shu kut tang ha ka jingphohsniew.
Une u Rangbah ula phai khmat mynta sha ka Sorkar Jylla ba kan thaw ia ki lad ki lynti ban buh noh ia ki jaka ban tyngkai bad pynsah nam ia ki tiar tem tiar put tynrai hala ki jong ki jong ki District, khnang ba kan pynsuk ia kito kiba don ka sap ka phong ba kin shna bad ban pyndonkam ia ki.
Ka sap jong une u rangbah kam shym kut tang hangne hynrei u dei ruh uba don ka sap ban thain ia ki jingthain kti ia ki mar bapher bapher da ki siej.
