Shillong, Naiwieng 14: Ka Sorkar Pdeng kala pynmih ia ka jingpynbna ha ka sngi Palei, ba pynjlan ia ka jingkhein be-ain ia ka kynhun kieng atiar Hynniewtrep National Liberation Council (HNLC) sa 5 snem.
Katkum ka jingpynbna kaba la pynmih da ka Ministry of Home Affairs (MHA) kala ong “Ka Sorkar Pdeng haba khmih ia ki kam be-ain kiba la kdew haneng bad ia ki kam be-ain kiba la leh ha ki snem kiba la leit da ka HNLC, ka don ia ka jingsngewb a donkam ban pynbna ba ka HNLC ryngkat bad ki tnad ki jongka kum ka kynhun kaba be-ain bad kane kan treikam mardor bad kadei kaba la leh katkum ka bor kaba la pynkup ha ki kyndon jong ka sub-section (3) jong ka section 3 jong katei ka Ain. Kumta la bthah ba kane ka jingpynbna paidbah kan long halor ia kano kano ka hukum ia kaba lah ban pynmih lyngba ka section 4 jong katei ka ain, kan treikam noh mardor naduh ka 16 tarik u Naiwieng 2024 na ka bynta ka 5 snem kynthih.
Ka MHA kala ong ba ka HNLC bad ki shnat ki jong ka baroh ha Meghalaya kala donkti ha ki kam kiba la ktah ia ka synshar khaddar bad ia ka nongrim jong ka ri India.
La ong ba ka sorkar pdeng ka don iaka jingsngew ba ka HNLC kala pynbna ia ka jingthmu ban pynioh laitluid noh ia ki jaka ka Jylla Meghalaya kaba bun ki nongshong shnong da ki riewlum Khasi bad Jaintia, na ka ri India bad kala bteng ban leh ia ki kam bymman bad thombor ia ki nongshong shnong da kaba dawa pisa na ka bynta ki kam jong ka seng.
Ka Ministry kala pynpaw shuh shuh ba ka HNLC kala pynneh ia ka jingiadei bad kiwei pat ki kyhun kieng atiar ka thain shatei lam mihngi ha kaban pyniaid shakhmat ia ki kam dawa pisa bad kala donkti ha ki 48 tylli ki kam runar, kiba kynthup ia ka jngpynbthei ne jingbuh ia ki tiar pynbthei bom ha kylleng ka jylla Meghalaya, naduhka por jong ka 16 tarik u Naiwieng 2019 haduh ka 30 tarik u Jylliew 2024. Ha kitei ki por, ki bor kiba dei khmih kila pyntip ia ka jingkem ia ki 73 ngut ki dkhot bad ka jingwna pyndem wait jong ki 3 ngut ki dkhot ki jong ka.
Lah ong ba ka sorkar Meghalaya kala ai ruh ia ka jingai jingmut ban pynbna ia ka HNLC kum ka kynhun be-ain hapoh jong ka Unlawful Activities (Prevention) Act, 1967.
