Shillong, Lber 18 : Ka Jylla Meghalaya kaba hap hapoh u Seismic Zone-V ka dei kaba jur bha ka jingkhynniuh u jumai bad tang ha kine ki 10 snem bala leit noh, haduh 247 sien u jumai ula khynniuh ha Jylla bad ha ki jaka ba marjan.
Ha u snem 1897, ka Jylla kala shah ktah jur na u jumai uba kot haduh 8.7 magnitude, kaba wanrah ia ki jingjulor bad ki jingjynjar kaba klai bha. U jumai ba 8.5 magnitude ula khynniuh ruh ha us nem 1950 kaba lam sha ka jingiap jong ki briew bad jingjulor jong ki jingdon jingem.
Ka Jylla kala mad ia bun bah ki jingkhynniuh u jumai kiba rit, kiba ju jia jan manla ka por.
Kat kum ki jingkhein na ka Meghalaya Earthquake Report, la iathuh ba kine ki 247 sien ki jingkhynniuh jumai ki dei kiba kot 4 ne palat ia ka magnitude ha u richter scale bad kiba hap hapoh ka 300 kilometer.
La ong ba ka jingkhynniuh u jumai hangne kala jia kumba 24 sien ha ka shisnem kaba mut 2 sien ha ka shibnai. La iathuh ba u jumai un khynniuh hajan ka Jylla Meghalaya jan manla ka 14 sngi.
Kaba bun eh ka jingkhynniuh u jumai hajan ka jylla Meghalaya ka dei ha u snem 2020. Haduh 33 sien u jumai (mag 4+) ula khynniuh ha ki jaka kiba hapoh ka 300 Km na Jylla Meghalaya ha une u snem. Uba khlain eh u dei uba kot 5.5 magnitude.
Kane ka jingkhein ka dei kaba la kyntait noh ia ki jumai kiba khynniuh hapoh ka 4 magnitude ha u richter scale.Ym pat don u jumai uba la kot haduh 7 ne palat ha u richter scale, u ban khynniuh ha Meghalaya kat haduh kane ka por.
U Jumai uba khlain eh ha kine ki 10 snem u dei uba la jia ha ka 4 tarik Kyllalyngkot, 20166 ha ka por 4:35 . Une u jumai ula kot ia ka jingkhlain ba 6.7 ha u richter scale bad ka thymmei ka dei na ka jaka ba jngai 197Km na East-Southeast ka Shillong ha ka jingjylliew ba 55 Km.
Ha ki por mynshuwa, u jumai ba kot 7.2 ha u richter scale ula khynniuh ha ka 23 tarik Risaw, 1943 na ka thymmei kaba jngai 232 km East-Southeast ka Shillong. U dei ruh u jumai uba khlain duh hajan Meghalaya ha ki 125 snem bala leit noh.
