Nongstoiñ, Jymmang 21: Ka Meghalaya State Network of Positive People (MSNP+), da ka jingkyrshan lang ka Meghalaya AIDS Control Society (MACS), mynta ka sngi ka la rakhe kynmaw ïa ka sngi kyrpang ki nongpang Ñiangkulia (AIDS) kiba la khlad noh lyngba katei ka jingpang.
Kumjuh ruh, kine ki kynhun kila kynmaw burom ïa ki nongnoh synñiang radbah ne ki nongkyrshan met bad mynsiem ban ïarap ne sumar ïa kum katei ka jingpang.
Ïa kane ka sngi la tip ruh kum ka 41st International AIDS Candlelight Memorial Service, ïa kaba la buh ruh ka phang pdeng kum ka ‘Together we remember, together we heal through love and Solidarity’. Ïa ka jingïalang la pynlong ha ka SGSY Hall, B.D.O C&RD ophis Nongstoiñ.
Ha ka jingïalang u bah T.Diengngan Block Development Officer Nongstoiñ C&RD Block u la long kum u kongsan bad I Dr. B.Decruse Project Director MACS, kum I symbud kongsan bad la ïadonlang ruh u bah M.Paul Hrangbung President ka Meghalaya State Network of Positive People (MSNP+) bad kiwei kiwei.
La ong ruh ba la sdang nyngkong eh ban rakhe ïa katei ka sngi, naduh u snem 1991 bad ban ai jingsumar ïa kum katei ka jingpang pat, la sdang nyngkong ha u snem 2006 ha Civil Hospital Shillong. Mynta ka jylla ka la don haduh 4 tylli ki jaka ai jingsumar haduh mynta mynne khlem da kynthup ïa ki shnat.
Ki nongkren haba ai jingkren ki la ïawer ïa ka imlang sahlang ban ym ñiewbeiñ ñiewpoh ïa kiba la ngat ha kum kane ka jingpang. Hynrei ryngkat da kaba ïatreilang, yn lah ban ïakhun bad ka dei ka kamram ban ïa ai mynsiem, namar lada phikir ban shimkhia ban dih dawai, da lei lei katei ka jingpang kan ym lam sha ka jingïap.
La kren shai ruh ba kam don kano kano ka jingma ban ïabit haba ïa sahlang, ïa bam lang dih lang, lait noh lada pyndonkam lang ïa u thyrnia injek, ka kam shongkha pathar, ka jingïa ai snam bad kiwei kiwei.
Ha kane ka sngi, kum ka dak ka jingsngew lem ïa kiba la khlad noh na kane ka sla pyrthei lyngba katei ka jingpang. Kumjuh ruh ban sngew lem lang ruh ïa kiba la khlad noh na kane ka pyrthei, kiba dei ruh ki nongkyrshan shitrhem ïa ki nongtrei nongsumar ïa kum kane ka jingpang, katei ka kynhun ka la thang ruh ïa ki mombati.
